पोखरा । नेपाल प्रज्ञा प्रतिष्ठान र मार्क्सवादी अध्ययन स्रोत केन्द्र पोखराको सहकार्यमा कास्कीको पोखरामा दर्शनसम्बन्धी विचारगोष्ठी सम्पन्न भएको छ ।
विजय ढकाल सहिद स्मृतिपार्कको घनश्याम स्मृतिकक्षमा २०८१ फागुन १७ गते शनिबार सो कार्यक्रम सम्पन्न भएको हो ।
गोष्ठीमा “पौरस्त्य र पाश्चात्य समाजमा परमाणुवाद” शीर्षकमा रामराज रेग्मीले र “नेपालमा प्रचलित दर्शनमा भौतिकवाद” शीर्षकमा परशुराम कोइरालाले कार्यपत्र प्रस्तुत गर्नुभएको थियो ।
उल्लिखित पहिलो कार्यपत्रमा अशोकविक्रम जिसी (समीर सिंह) र प्राडा शोभाकान्त लामिछानेले तथा दोस्रो कार्यपत्रमा शेषमणि आचार्य र सावित्रा दुराले टिप्पणी गर्नुभएको थियो ।
फ्लोरबाट १५ जनाभन्दा बढी विद्वान जिज्ञासुहरूले सुझाव तथा जिज्ञासा राख्नुभएको थियो ।
नेपाल प्रज्ञा–प्रतिष्ठान दर्शन विभागका प्रमुख प्राज्ञ डा. कृष्णराज अधिकारीले विषयको महत्त्वबारे बताउँदै दार्शनिक अध्ययन र चिन्तनको विकासमा प्रज्ञाले प्रयास गरिरहेको बताउनुभयो ।
श्रोत केन्द्रका अध्यक्ष झलकपाणि तिवारीको अध्यक्षतामा सम्पन्न सो कार्यक्रमको सञ्चालन डिल्लीप्रसाद ढुङ्गानाले गर्नुभएको थियो ।
