रूपन्देही । प्रगतिशील लेखक सङ्घ रुपन्देहीको दशौँ जिल्ला सम्मेलनपछिको पहिलो बैठक तथा पद हस्तान्तरण कार्यक्रम सम्पन्न भएको छ ।
२०८१ फागुन ७ गते बुधबार नयाँ कार्यसमितिको औपचारिक पदस्थापन गर्दै बैठक सम्पन्न भएको हो।
बैठकले जिल्ला समितिको सल्लाहकारमा पूर्व अध्यक्षहरू प्राडा कृष्णचन्द्र शर्मा, प्राडा कपिलदेव लामिछाने, प्राडा हिरण्यलाल ज्ञवाली, गोपीरमण उपाध्याय, डा. मुरारी पराजुली, प्रदीप प्रधान, देवेन्द्र घिमिरे, दलबहादुर गुरुङ र कविराज पौडेललाई चयन गरेको बताइएको छ ।
बैठकमा नवनिर्वाचित अध्यक्ष कृष्ण गाउँलेले नयाँ योजनाहरू प्रस्तुत गरेका थिए । बैठकद्वारा पारित प्रमुख कार्यक्रममा प्रशिक्षण कार्यक्रम, दर्शन पाठशाला, विशेष साहित्यिक दिवस, प्रगतिशील साहित्ययात्रा, स्थानीय तहमा पालिका कमिटी विस्तार, प्रगतिशील कला–साहित्य महोत्सव, सम्मान तथा पुरस्कार अक्षयकोष, आकस्मिक उपचार सहयोग अक्षयकोष, कार्यालय व्यवस्थापन, पठन संस्कृति प्रवर्द्धन, वेबसाइट निर्माण, वामपन्थी घटकसँग अन्तरक्रियाजस्ता रहेका छन् ।
निवर्तमान कार्यसमितिबाट हरहिसाब हस्तान्तरण गरिएको सो बैठकमा बैङ्क खाता सञ्चालन गर्ने निर्णयसमेत पारित भएको थियो ।
बैठकमा केन्द्रीय सचिव दलबहादुर गुरुङ, केन्द्रीय सदस्य हृदय लेकाली, निर्वाचन समिति संयोजक तथा पूर्व अध्यक्ष डा. मुरारी पराजुली, लुम्बिनी प्रदेश उपाध्यक्ष तिलक लामिछाने, निवर्तमान अध्यक्ष कविराज पौडेल, पूर्व सहसचिव सीता काफ्लेले आआफ्ना धारणा राखेका थिए ।
कार्यक्रमको सञ्चालन सचिव यज्ञलाल सुवेदीले गरेका थिए ।
