काठमाडौँ । राष्ट्रिय रनिङ सिल्ड दोहोरीगीत प्रतियोगिताको आठौँ संस्करण आगामी फागुन १७ गतेदेखि २० गतेसम्म हुने भएको छ ।
२०८१ फागुन ३ गते शनिबार चितवनमा पत्रकार सम्मेलन गरी राष्ट्रिय लोक तथा दोहोरी गीत प्रतिष्ठानले जानकारी दिएको हो ।
फागुन १७ गतेदेखि २० गतेसम्म चितवनको सुन्दरनगरी भरतपुर नगरपालिकाको वडा नं. १० स्थित वीरेन्द्र क्याम्पसको डिग्री भवनको खेलमैदानमा आयोजना हुने प्रतिष्ठानकी अध्यक्ष रिता थापा मगरले बताइन् ।
प्रतियोगितामा प्रथम पुरस्कार तीन लाख, द्वितीय पुरस्कार दुई लाख, तृतीय पुरस्कार एक लाख र सान्त्वना पुरस्कार ५० हजार रपैयाँ प्रदान गरिने बताइन् ।
प्रतियोगी कलाकारमध्येबाट उत्कृष्ट गायक, उत्कृष्ट गायिका, उत्कृष्ट भेषभूषा, उत्कृष्ट नवगायक, उत्कृष्ट नवगायिकालाई समेत आकर्षक पुरस्कारको व्यवस्था गरिएको उनले जानकारी दिइन् ।
आठौँ राष्ट्रिय रनिङ सिल्ड दोहोरीगीत प्रतियोगितामा पचास लाख नेपाली र नेपालीभाषी दर्शकले अवलोकन गर्ने अपेक्षा गरेको उनको भनाइ छ ।
