बेलबारी, (मोरङ) । बेलबारी नगरपालिकाद्वारा बेलबारी नगरभित्रका भाषा, साहित्य, कला, संस्कृतिको संरक्षण, विकास र विस्तार गर्न/गराउन गठित बेलबारी प्रज्ञा–प्रतिष्ठानद्वारा बहुभाषी कविता गोष्ठी शनिबार सम्पन्न गरेको छ ।
प्रमुख अतिथि बेलबारी प्रज्ञा–प्रतिष्ठानका प्रमुख संरक्षकसमेत रहनुभएका बेलबारी नगरपालिकाका प्रमुख दिलप्रसाद राईको उपस्थितिमा २०८१ माघ २६ गते भएको हो ।
राइले विविध भाषाहरूमा रचना प्रस्तुत हुनु बेलबारीको सुखद पक्ष हो, किनकि कतिपय भाषाहरू बोलीचालीमा मात्रै सिमित छन्, तर साहित्यले भइसकेका छैनन्, यस्ता कार्यक्रमहरूले ती भाषाहरूलाई समृद्ध बनाउन मद्दत् पुग्ने बताए ।
विशिष्ट अतिथि प्रतिष्ठानकी संरक्षक तथा उपप्रमुख नितु थापा कोइरालाले साहित्यले मनोरञ्जन मात्र होइन ज्ञान पनि दिने भएको हुनाले साहित्यको प्रवर्धन गर्नुपर्ने बताइन् ।
कार्यक्रममा टिप्पणीकार ईरानराईले नेपालमा बहुभाषी साहित्य भनेको मुख्यतया लोकसाहित्य भएकोले भाषा–रूपान्तर यन्त्रहरूको व्यवस्था गर्नुपर्ने जसले गर्दा विभिन्न भाषाका रचनाहरूलाई दर्शक÷श्रोताहरूले नबुझ्लान् कि भन्ने त्रास र कतिपयले अनुवादसमेत गरेर समय बढी लिइदिने समस्याबाट मुक्ति हुने बताए ।
कार्यक्रममा प्रेम गुरुङले गुरुङ, शिवनारायण पण्डित सिङ्गलले मैथिली, शिव छाङछा र पारुहाङ राईले बान्तावा, हुपेन्द्र भण्डारीले संस्कृत, सन्देश तामाङ र भावना तामाङले तामाङ, सरिता तुलाधर र तरुषा प्रधानले नेपाल (नेवारी), कलावती खवासले खवास, सुधार्नी राजवंशी, राजासाहेव राजवंशी र टङ्क राजवंशीले राजवंशी, सरस्वती याखाले याखा, अस्मिता उरावले उराव, चन्द्रकुमारी लिम्बूले लिम्बू, भुवन कार्कीले अङ्ग्रेजी, दुखनी दनुवारले दनुवार, दिप मङ्ग्राती, विनोदकुमार चापागाईँ, युसन सापकोटा, शान्ता न्यौपाने, तीर्थराज सिग्देल, जुनु बुढाथोकी, फणिन्द्रप्रसाद निरौला, मैया विश्वकर्मा, टीकाराम कार्की र लाखजित राईले नेपाली खस, शेरबहादुर खपाङ्गीले मगर, कविन्द्रराज धिमाल, सञ्जीव धिमाल, टीका धिमाल र सन्दिरा धिमालले धिमाल भाषामा कविता÷गीत प्रस्तुत गरेका थिए ।
त्यस्तै, कार्यक्रममा प्रदिप्ती दाहालले आकर्षक नृत्य प्रस्तुत गरेकी थिइन् ।
कार्यक्रममा जेबी थुलुङ, भूपेन्द्रप्रसाद कोइराला, रमेश निरौला, धनजित पराजुली, केशु विरही, नवशीला, भगवती श्रेष्ठ अतिथि थिए ।
कार्यक्रममा बेलबारीका भुवन कार्कीको ’मलाई पनि’ बोलको गीतको श्रव्य–दृश्यको लोकार्पण गरियो । उक्त गीतको शब्द भुवन कार्की, सङ्गीत तथा स्वर राज सागर तथा अभिनय विक्रम पोख्रेले ऋषि, कविता न्यौपाने र भुवन कार्कीको रहेको थियो ।
सबै भाषाका साहित्यको विकासमा लागिरहने प्रतिष्ठानकी अध्यक्ष रेखा सुवेदीले प्रतिबद्धता जनाइन् ।
बेलबारी नगरपालिकाको बेतना सभाकक्षमा सम्पन्न कार्यक्रमको अध्यक्षता प्रतिष्ठानकी अध्यक्ष रेखा सुवेदी, सञ्चालन सचिव कुलप्रसाद बराल, कार्यक्रमको विषय वस्तु उपाध्यक्ष प्रकाश मनकुमार गुरुङको रहेको थियो ।
