दाङ । रक्तिम सांस्कृतिक अभियान घोराही नगर समितिको आयोजनामा सडक सांस्कृतिक कार्यक्रम सम्पन्न भएको छ ।
घोराहीको निमाहल रोडमा २०८१ माघ २१ गते सोमबार सो कार्यक्रम सम्पन्न भएको हो ।
कार्यक्रमपूर्व राष्ट्रिय जनमोर्चा घोराही नगर समितिका अध्यक्ष मनिराम खनालले कार्यक्रमको औचित्यबारे मन्तव्य राख्नुभएको थियो ।
त्यस क्रममा उहाँले राजमोले आगामी चैत २४ देखि ३० गतेसम्म गर्न लागेको सङ्घीयता विरुद्धको काठमाडौँकेन्द्रित आन्दोलनलाई सफल पार्न, त्यो आन्दोलनप्रति जनतामा सचेतता फैलाउन र सङ्घीय प्रदेश संरचना खारेजीको आन्दोलनलाई अगाडि बढाउनु सम्पूर्ण देशभक्त नेपालीको कर्तव्य भएको बताउनुभयो ।
त्यस्तै, अखिल (छैठौं) का केन्द्रीय सदस्य सेवक भट्टराईले ठुला पार्टी भनिएका नेपाली काङ्ग्रेस, नेकपा एमाले, नेकपा (माओवादी केन्द्र) लगायतले अनावश्यक रूपमा यो देशमा सङ्घीयता भित्राएर राष्ट्रघाती काम गरेको आरोप लगाउनुभयो ।
उक्त कार्यक्रम सार्वजनिक विदाको दिन वा शनिबार पारेर घोराहीबजारका विभिन्न चोकमा चैत २० गतेसम्म सञ्चालन हुने रक्तिम घोराहीका नगर अध्यक्ष उत्सव पुनले जानकारी दिनुभयो ।
