काठमाडौँ । नेकपा (मसाल) ले टर्कीको सरकारले क्रान्तिकारी समाजवादीमाथि दमन गरेको भन्दै त्यसको भर्त्सना गरेको छ ।
महामन्त्री मोहनविक्रम सिंहको हस्ताक्षरमा २०८१ माघ १९ गते शनिबार प्रेसवक्तव्य जारी गर्दै मसालले भर्त्सना गरेको हो ।
टर्कीको सरकारले त्यहाँका ३४ जना क्रान्तिकारीलाई गिरफ्तार गरेको जानकारी दिँदै मसालले त्यहाँका क्रानितकारीको स्प्रिटमा कुनै कमी नआएको बताएको छ ।
मसालले गिरफ्तार सम्पूर्ण क्रान्तिकारीको रिहाइ गर्न माग गरेको छ ।
यस्तो छ, प्रेसवक्तव्यको पूर्ण पाठ :
“टर्कीको फासिष्ट सरकारले क्रान्तिकारी समाजवादीमाथि गरेको गिरफ्तारी र दमनको नेकपा (मसाल) ले कडा शब्दमा भर्त्सना गर्दछ ।
जनवरी २१, २०२५ मा टर्कीको तानाशाही सरकारले इस्तानबुल, इज्मिर, अङ्कारा, एक्सिर, एलोवा र दियाबकिरमा ३४ जना क्रान्तिकारीलाई गिरफ्तार गरेको थियो । त्यसरी गिरफ्तार हुने प्रमुख व्यक्तिमा समाजवादी पार्टी, समाजवादी महिला सङ्गठन वा समाजवादी युवा सङ्गठनका कैयौँ नेता र कार्यकर्ता छन् तर त्यस प्रकारको गिरफ्तारी वा दमनका बाबजुद उनीहरूको क्रान्तिकारी स्प्रिटमा कुनै कमी आएको छैन र उनीहरूले आफ्नो आन्दोलनलाई लगातार अगाडि बढाउने दृढता व्यक्त गरेका छन ।
टर्कीमा भएको त्यस प्रकारको गिरफ्तारी र दमनका विरुद्ध त्यहाँका विभिन्न राजनीतिक दल, नागरिक समाज, युवा, सामाजिक सङ्गठन र अधिवक्तासमेतमा व्यापक असन्तोष पैदा भएको छ ।
फासिवादका विरुद्ध तथा समाजवादका पक्षमा अडान लिएका कारणले ती व्यक्तिको गिरफ्तारी, अभिव्यक्तिको स्वतन्त्रता र लोकतान्त्रिक अधिकारमाथिको आक्रमण हो र टर्कीका विभिन्न राजनीतिक पार्टीले त्यहाँको त्यस प्रकारको दमनकारी कारबाहीप्रति कडा विरोध जनाएका छन । नेकपा (मसाल) ले टर्कीको तानाशाही शाषण र दमनकारी कार्यका विरुद्ध त्यहाँ उठिरहेका विरोधका स्वर र आन्दोलनसित एक्यबद्धता प्रकट गर्दछ ।
अन्तमा, हामीले टर्कीको फासिष्ट सरकारका सबै दमनकारी कारबाहीको कडा शब्दमा विरोध गर्दै त्यहाँ गिरफ्तार भएका सबै क्रान्तिकारीको रिहाइको माग गर्दछ ।”
