काठमाडौँ । ‘किसान अधिकार र कृषिसाहित्य’ को विषयमा प्रगतिशील लेखक सङ्घले सतहत्तरौँ परिसंवाद कार्यक्रम सम्पन्न गरेको छ ।
अखिल नेपाल किसान महासङ्घ (अप्फा) का अध्यक्ष भैरवराज रेग्मीको प्रमुख आतिथ्यमा २०८१ माघ ११ गते शुक्रबार केन्द्रीय कार्यालय बागबजारमा सो कार्यक्रम सम्पन्न भएको हो ।
कार्यक्रममा विषयवस्तु प्रस्तुत गर्दै रेग्मीले किसानलाई राज्यव्यवस्थाले अवहेलना गरिरहेको सन्दर्भमा किसानका वेदनाहरू समेटेर साहित्यको सिर्जना गर्नुपर्ने आवश्यकतामा जोड दिनुभयो ।
‘प्रलेसजस्तो सांस्कृतिक मोर्चाले किसान अधिकारलाई सम्बोधन गर्दै बढीभन्दा बढी कविता, कथा, गीतका साथै दार्शनिक रूपमा पनि चर्चा गर्नुपर्दछ’ उहाँले भन्नुभयो ।
किसानका उत्पादनलाई प्रयोग गर्ने तर प्रयोग गरिसकेपछि उनीहरूको श्रमलाई बिर्सनु दुःखद विषय भएको बताउँदै किसान नेता रेग्मीले बिचौलिया संस्कृति बलियो हुँदै जाँदा देशका किसानको अवस्था बेहाल हुँदै गएको विश्लेषण अगागि सार्नुभयो ।
उहाँले भन्नुभयो– ‘महिला किसानको अवस्था त झनै जटिल छ । उनीहरूको पीडालाई राज्यले सम्बोधन गर्न सकिरहेको छैन । त्यसैले पनि लेखक–साहित्यकारले किसानका अधिकारलाई सशक्त रूपमा सम्बोधन गर्नुपर्दछ ।’
मार्क्सले पनि मजदुरको कुरा उठाउँदा कृषिमजदुरको कुरा नउठाएको बताउँदै लेखक रेग्मीले भन्नुभयो– ‘नेपालको सरकारमा पुग्नेहरूले किसानका समस्या आफ्नो घोषणापत्रमा मात्र सीमित राखे । देशमा कृषिको योगदान ३२ प्रतिशत तर सरकारले कृषिमा ४ प्रतिशत मात्र बजेट छुट्याउनु एकदमै असमान व्यवहार हो ।’
अध्यक्ष डा. मधुसूदन गिरीको अध्यक्षतामा अघि बढेको कार्यक्रमको सञ्चालन सङ्घकी उपाध्यक्ष नमुना शर्माले गर्नुभएको थियो ।
परिसंवाद कार्यक्रमको विषयवस्तुको बारेमा संयोजक समीर सिंहले प्रस्ट पार्नुभएको थियो ।
कार्यक्रममा प्राडा जीवेन्द्रदेव गिरी, गोपिरमण उपाध्याय, डा. कृष्ण अधिकारी, केबी घले, धनबहादुर मगर, नीलकण्ठ अमात्य, तिलप्रसाद न्यौपाने, मोहन मल्ल, राजेश गोसाईं, जगत् वाशिष्ठ, सङ्घराम महर्जनलगायतले पूरक टिप्पणी गर्नुभएको थियो ।
