काठमाडौं । गाजामा युद्धविरामको घोषणा गरिएको छ । इजरायल र हमासबीच गाजामा युद्धविराम र इजरायली बन्धकहरू रिहाइ गर्ने सम्झौता भएको बीबीसीले जनाएको छ ।
युद्धविरामको घोषणापछि गाजाका बासिन्दाने उत्सव मनाउन थालेका छन्।
यद्यपि उक्त युद्धविराम आगामी आइतबारदेखि मात्र लागू हुने बीबीसीले जनाएको छ।
हमासले अक्टोबर २०२३ मा इजरेली भूमिमा अप्रत्याशित आक्रमण गर्दा १ हजार २ सय जनाजतिको मृत्यु भयो। तीमध्ये अधिकांश व्यक्ति सर्वसाधारण थिए।
उक्त घटनापछि इजरायलले गरेको प्रत्याक्रमणमा परेको गाजा तहसनहस भएको छ। बीस लाखभन्दा बढी गाजावासी विस्थापित भएका छन्।
हमासद्वारा सञ्चालित स्वास्थ्य मन्त्रालयका अनुसार इजरायली हमलामा परेर सर्वसाधारण नागरिक र लडाकुहरूसहित झन्डै ५०,००० जनाको मृत्यु भएको छ। मेडिकल जर्नल ‘लान्सिट’ मा प्रकाशित एउटा अध्ययनका अनुसार उक्त सङ्ख्या वास्तविकताभन्दा निकै कम हुन सक्छ।
पाश्चात्य देशका वरिष्ठ कूटनीतिज्ञहरू ४२ दिन कायम रहने पहिलो चरणको युद्धविरामपछि युद्ध फेरि सुरु हुन सक्ने चिन्तामा छन्।
मध्यपूर्वमा गाजा युद्धको व्यापक असर परेको छ।
‘इजरायल र प्यालेस्टिनीहरूबीच लामो समयदेखि द्वन्द्व चल्दै आएको छ। पन्ध्र महिना चलेको गाजा युद्धपछि पनि दुई पक्षबीच तिक्तता बाँकी नै छ र दुःसाध्य देखिन्छ’ बीबीसी समाचारमा उल्लेख छ ।
यो युद्धविरामले एक शताब्दीभन्दा पुरानो द्वन्द्व भने अन्त्य गर्दैन। यो युद्धले निम्त्याएको भौतिक विनाश र मानवीय क्षति कम्तीमा एक पुस्ताले अनुभूत गर्ने छ।
