काठमाडौं । अमेरिकाको लस एन्जल्स क्षेत्रमा फैलिएको डढेलोबाट कम्तिमा २४ जनाको ज्यान गएको छ ।
यो डढेलो अमेरिकी इतिहासकै सबैभन्दा बढ्ता आर्थिक क्षति गराउनेमध्येमा समेत पर्ने देखिएको बीबीसीले जनाएको छ ।
आइतवार मूल्यांकनकर्ताहरूले यसको प्रारम्भिक क्षतिको अनुमानलाई बढाउँदै त्यो २५० देखि २७५ अर्ब अमेरिकी डलरबीच हुने बताएका छन्।
अधिकारीहरूका अनुसार दक्षिण क्यालिफोर्निया क्षेत्रमा यतिखेर १४ हजार अग्नि नियन्त्रकहरू सक्रिय छन् जसलाई ८४ वटा विमान र १,३५४ वटा दमकलहरूले सघाइरहेका छन्।
अनिवार्य रूपमा घर छाड्नुपर्ने आदेशका कारण अन्यत्र सारिएका मानिसहरूको सङ्ख्या घटेर यतिखेर १ लाख पाँच हजार पुगेको छ।
अझै ८७ हजार मानिसहरूलाई घर छाड्नुपर्ने हुन सक्ने भनिएको छ।
क्यालिफोर्नियाका मौसम पूर्वानुमानकर्ताहरूले ठूलो हुरीको चेतावनी दिएसँगै त्यहाँ लागेको आगोले यो साता फेरि उग्र रूपले फैलने ठानिएको छ।
अग्नि नियन्त्रकहरू झन्डै एक सातादेखि उक्त डढेलो नियन्त्रणको प्रयास गरिरहेका छन्। यसबीचमा उनीहरूले तीनवटा डढेलो नियन्त्रण गर्ने काममा उल्लेख्य प्रगति गरेको बताइएको छ।
सप्ताहान्तमा हावाको वेग तुलनात्मक रूपमा केही शान्त रहे तापनि सुक्खा हावासहितको निकै खराब सेन्टा एना वायु आइतवार रातिबाट बुधवारसम्म सक्रिय हुने भन्दै चेतावनी दिएका छन्।
उक्त हुरीको गति प्रतिघण्टा ९६ किलोमिटरसम्मको हुन्छ।
गत मङ्गलवारदेखिको यस विपद् नियन्त्रणको प्रयासमा जुटेका स्थानीय अग्निनियन्त्रकहरूलाई अन्य आठ राज्यका साथै क्यानडा र मेक्सिकोका सहायताकर्ताहरूले साथ दिइरहेका छन्।
पूरै एलए काउन्टीलाई सजग अवस्थामा राखिएको छ।
