काठमाडौं । लकडाउनको अवधिमा कार्यरत स्थानमा खाने बस्ने समस्या भएपछि भारतका विभिन्न सहरबाट घर फर्किएका मजदुरहरुलाई कैलालीको नेपाल भारत सीमास्थित गौरिफन्टा नाकाबाट प्रवेश नदिएर उत्तरप्रदेशको पलिया पुर्याएर छोडेको पीडितहरुले बताएका छन् ।

पलियाको निकासन रोडमा अलपत्र परेका ति नेपालीले आफूहरु कोरोना लागेर भन्दा पनि डेंगु लागेर मर्ने अवस्थामा पुगेको भन्दै तत्काल उद्धारको माग गरेका छन् ।

भारतका विभिन्न शहरबाट हिजो मात्रै ७२३ नेपाली पलिया आइपुगेको जानकारी प्राप्त भएको छ । उनीहरु सुदूरपश्चिमका लगभग सबै जिल्ला र सुर्खेतका समेत छन् ।

सुदूरपश्चिम प्रदेशका मुख्यमन्त्रीलाई सम्बोधन गरी सामाजिक सञ्जालमा पीडितहरुले आफ्नो सम्पर्क नम्बरसहित लेखेको उद्धारको याचनालाई हामीले जस्ताको तस्तै दिएका छौं ।

यस्तो छ पीडितको याचना
श्रीमान माननीय मुख्य मन्त्रीज्यू
प्रदेश न ७ (सुदूरपश्चिम प्रदेश)
धनगढी कैलाली
बिषयः उद्धार गरि पाउँ ।
उपयुक्त सम्बनमा यस विश्व माहामारीको कोरोना भाइरसको कारणले गर्दा नेपाली मजदुर आफ्नो स्वदेश फर्कन चाहान्छन् । भारतको विभिन्न सहरबाट आएर पलियाको निकासन रोडमा अलपत्रमा परेका छन् । आफ्नै जन्मभूमि आउँदा खेरि गौरिफन्टा सिमानादेखि हामिीहरुलाई फर्काएर पलिया ल्याएर निकासन रोडमा अलपत्रमा पारि दिएको छ । माननीयज्यु हजुरले त भारतमा बस्ने नेपालीहरुको त समस्या बुझ्नु हुन्छ होला नि । खै त आफ्नै सिमानामा आउँदा खेरि हजुरले किन उद्धार नगरिदिएको ?

अहिले झन् के आई सिंह गाउँपालिका (डोटी) का ६÷७ जना झन् अलपत्रमा छन् । अरु महेन्द्रनगर, (कञ्चनपुर) बैतडीका ५० जना अलपत्रमा परेको छन् । यता कोरोना भन्दा डेंगो लागेर मर्ने सम्भावना छ । माननीय ज्यू हामिलाई अरु केहि चाहिँदैन आफ्नै देशमा क्वारेन्टिनमा बस्न तयार छौं । हामीहरुलाई छिटो भन्दा छिटो उद्धार गरि दिन हार्दिक अनुरोध गर्दछौं ।
निकासन रोड युपी पलिया (भारत)
जनक महत, सम्पर्क नं ९१८५२९२६३६८१
कैलास बेलाल, सम्पर्क नं ९१७३५७२३६२३७