देउखुरी । दाङको भालुवाङमा रहेको होटल पौवाले अङ्ग्रेजी नयाँ वर्ष २०२५ को अवसरमा सांस्कृतिक कार्यक्रम गर्ने भएको छ ।
अङ्ग्रेजी नयाँ वर्ष २०२५ को शुभारम्भका अवसरमा होटलले पुस १६ साँझ ७ बजेदेखि १२ बजेसम्म बृहत् सांस्कृतिक कार्यक्रम गर्ने होटल पौवा भालुवाङका म्यानेजर श्याम न्यौपानेले जानकारी दिए ।
कार्यक्रममा लोकगायक रामजी खाँडको विशेष प्रस्तुति रहनुको साथै गायक सुविनसिंह एन्ड ब्यान्डको साङ्गीतिक प्रस्तुति रहने उनले बताए ।
उक्त बृहत सांस्कृतिक कार्यक्रममा गायक खाडसँगै चन्द्रा सुनार, तबला मादलवादक प्रवेश महर्जन, गितारिस्ट अभिनाष श्रेष्ठ र किबोर्डमा अनिल विश्वकर्माको सहभागिता रहने छ ।
कार्यक्रममा प्रवेश निःशुल्क रहेको होटलले जानकारी दिएको छ ।
“जहाँबाट आतिथ्यको सुरुआत हुन्छ” मूल नारासहित नेपाली आतिथ्यसहितको सेवा दिने उद्देश्यले देशभर शाखा विस्तारमा गरिरहेको पौवाले नयाँ वर्षको अवसरमा होटल पौवाका अन्य शाखामा पनि सांस्कृतिक कार्यक्रम आयोजना हुने होटल पौवा प्रालिका प्रमुख सञ्चालन अधिकृत कृष्ण गौतमले जानकारी दिए ।
भालुवाङसँगै पोखरा, रुपन्देही, भैरहवा, घोराही र नवलपुरको गैँडाकोटमा रहेका शाखामा पनि १६ गते नै सांस्कृतिक कार्यक्रम आयोजना गर्न लागिएको उनले बताए ।
निकट भविष्यमै १०० शाखा बनाउने लक्ष्य लिएको होटल पौवाको अहिले देशभर १७ शाखा रहेको उनले जानकारी दिए ।
होटल पौवाको शाखाहरू कर्णाली प्रदेशको जुम्ला, सुदूरपश्चिमको धनगढी, लुम्बिनी प्रदेशमा दाङ भालुवाङ, घोराही र लमही, कपिलवस्तुको गोरुसिङ्गे, रुपन्देहीको योगीकुटी, भैरहवाको चिल्ड्रेन पार्क, पाल्पाको तानसेन, गुल्मीको रेसुङ्गामा रहेको छ ।
त्यस्तै, गण्डकी प्रदेशको पोखरा र नवलपुरमा होटलले शाखा विस्तार गरिसकेको छ । बागमती प्रदेशमा काठमाडौँको गौशाला, सिन्धुलीको मुलकोट र चितवनको भरतपुरमा पौवाको शाखा छ ।
एवम् प्रकारले कोशी प्रदेशमा खोटाङको हलेसीमा यसले सेवा विस्तार गरेको छ । छिट्टै बाँकेको नेपालगन्जमा पाँचतारे स्तरको होटल पौवा सञ्चालनको तयारीमा रहेको अधिकृत गौतमले बताए ।
होटल पौवाले नेपालमै रोजगारी सिर्जना गरी युवा जनशक्ति पलायन रोक्ने लक्ष्य लिएर अघि बढेको अधिकृत गौतमले सुनाए । होटलको अर्को उद्देश्य भनेको रैथाने खाना र नेपाली मौलिक परम्परा जोगाउनु रहेको उनले बताए । सोहीअनुरूप होटलले नेपालीले परम्परादेखि मनाउँदै आएको चाडपर्वमा विशेष कार्यक्रम गर्दै आएको छ ।
