लिबाङ । मेघनाथ विष्टद्वारा लिखित “मिझिङवासीका वंशावली” पुस्तक विमोचन भएको छ ।
अखिल नेपाल प्रगतिशील लेखक सङ्घ (अन्पा) का अध्यक्ष समीर सिंहको प्रमुख आतिथ्यमा २०८१ मङ्सिर १८ गते मङ्गलबार सो पुस्तक विमोचन भएको हो ।
सुनिलस्मृति गाउँपालिकाको चन्द्रप्रभा मावि पोखडाँडामा आयोजित एक औपचारिक कार्यक्रममाझ प्रमुख अतिथि सिंहले सो पुस्तक विमोचन गर्नुभएको थियो ।
मिझिङवासीका विभिन्न जातिका वंशको खोज, अध्ययन तथा अनुसन्धान गरी लेखक विष्टले सो पुस्तक तयार पार्नुभएको हो ।
प्रगतिशील लेखक सङ्घका केन्द्रीय उपाध्यक्षसमेत रहनुभएका सिंहले पुस्तक विमोचन गर्दै मिझिङस्थित विभिन्न जातिका खोजअनुसन्धानबाट तयार पारेको पुस्तक नयाँ पुस्ताका लागि एकदमै राम्रो सामग्री बनेको बताउनुभयो ।
उहाँले भन्नुभयो– ॅसमाजमा भएका यथार्थ तस्बिरलाई उजागर गर्दै यस प्रकारको लेखन अभ्यासलाई निरन्तरता दिइनुपर्दछ ।’
कार्यक्रमलाई सम्बोधन गर्दै नेपाली लेखक सङ्घका केन्द्रीय कोषाध्यक्ष दामु महर्षिफूलले मिझिङबासीको इतिहास अध्ययनको आधारमा तयार पारिएको यो पुस्तकबाट मेखबहादुर विष्ट एउटा सशक्त लेखकको रूपमा स्थापित भएको बताउनुभयो ।
फत्तेप्रचण्ड घर्तीमगरको सञ्चालन तथा मिझिङका ज्येष्ठ सदस्य रेशम विष्टको अध्यक्षतामा अगाडि बढेको उक्त कार्यक्रममा उपस्थित व्यक्तित्वलाई अन्पाकी केन्द्रीय सदस्य खगेन्द्रा विष्टले स्वागत गर्नुभएको थियो ।
कार्यक्रममा सर्वप्रथम लेखनको अनुभूति तथा लेखनको सन्दर्भमा भएको विभिन्न चुनौतीको बारेमा पुस्तकका लेखक विष्टले प्रकाश पार्नुभएको थियो ।
सो अवसरमा दीपेश पराई विष्ट, गन्जबहादुर क्षेत्री, हीराबहादुर थापा, दुर्गाप्रसाद रोका, तिलबहादुर ओली, केशरबहादुर विष्ट, धिरज घर्तीमगरलगायतले मन्तव्य राख्नुभएको थियो ।
कार्यक्रममा पुस्तकमा जानकारी दिने स्रोतव्यक्ति तथा सहयोगदातालाई कदरपत्र र फूलमालासहित सम्मान गरिएको थियो ।
