काठमाडौं । संयुक्त राज्य अमेरिकी सेनाको एक टोली नेपाल आएको छ ।
भदौ ३० गतेबाट असोज ४ गतेसम्म नेपाली सेनासँग संयुक्त अभ्यास ‘प्यासिफिक एन्जेल’ का लागि अमेरिकी सेना नेपाल आएको जंगी अड्डाले जनाएको छ ।
नेपाली सेनाका अनुसार अभ्यासमा विभिन्न प्रकारका विपद्को दौरान सञ्चालन गरिने खोज तथा उद्धार कार्यलाई थप प्रभावकारी बनाउन अपनाउनु पर्ने विद्यमान विधि तथा प्रक्रियाहरूका सम्बन्धमा ज्ञान आदान प्रदान हुनेछ। काठमाडौँ, मकवानपुर र धादिङ जिल्लाहरूमा सो सम्बन्धी विभिन्न अभ्यासहरु सञ्चालन हुनेछन्।
सन् २०१२ बाट सुरु भएको उक्त अभ्यासको यो चौथो संस्करण हो।
नेपाली सेना र अमेरिकी सेनाबीच विगत लामो समयदेखि विपद् व्यवस्थापन तथा मानवीय सहयोगको क्षेत्रमा अनुभव आदानप्रदान गरी विपद् प्रतिकार्य क्षमता अभिवृद्धि गर्ने उद्देश्यले विभिन्न अभ्यासहरू सञ्चालन हुँदै आई रहेका छन्।
यस प्रकारका अभ्यासहरूबाट विशेषज्ञता आदानप्रदान हुन गई सैनिक पेसागत क्षमता अभिवृद्धिमा मद्दत पुग्दै आएको नेपाली सेनाले जनाएको छ।
