जुमानसिंह केसी, प्युठान ।
राष्ट्रिय जनमोर्चा प्युठानले विभिन्न माग सहित स्थानीयतहमा ज्ञापनपत्र बुझएको छ।
राष्ट्रिय जनमोर्चा नगर तथा गाउँपालिका समितिद्वारा स्थानीय तहका प्रमुखहरूलाई स्थानीय, जिल्ला र राष्ट्रियस्तरमा देखिएका समस्या तथा सवालहरू लिएर ज्ञापनपत्र पेश गरिएको राजमो प्युठानले जनाएको छ।
स्थानीय तह जनताको नजिकैको सरकार भएकोले जनताको आवश्यकतालाई मध्यनजर गरी काम गर्नुपर्ने, विकास निर्माणका काम गुणस्तरीय र प्रभावकारी हुनुपर्ने, भ्रष्टाचारलाई न्यूनीकरण गर्न पहल गर्ने, ग्रामिण सडक, विद्युत्, खानेपानी लगायतका समस्या तत्काल समाधान गर्नुपर्ने, चालु खर्च घटाएर पुँजीगत खर्च बढाउनु पर्ने, असारे विकासको अन्त्य गरी समयमै योजनाका काम सुरु गर्नुपर्ने, कृषि तथा फलफूल खेती बिस्तार तथा प्रवर्द्धन गर्नुपर्ने लगायत माग राखेको छ।
ज्ञापन पत्रमा देशमा देखिएका राष्ट्रघाती एमसीसी खारेज गर्ने, १९५० लगाएतका सन्धि खारेज गर्नुपर्ने, संघीयताले देशको लागि उपयुक्त नभएकोले खारेज गर्नुपर्ने, कालोबजारी, कृत्रिम अभाव, मूल्यवृृद्धि आदि रोक्नपर्ने जस्ता जल्दाबल्दा सवालको उठान गरिएको छ ।
राष्ट्रिय जनमोर्चा प्युठानको बैठकले गरेको निर्णय अनुसार भदौ २७ गते प्युठान जिल्लाका सबै स्थानीयतहमा ज्ञापनपत्र बुझाउने निर्णय भएको थियो । सोही अनुसार सरुमारानी गाउँपालिका बाहेक सबै गाउँ तथा नगरपालिकामा ज्ञापनपत्र बुझाइएको अध्यक्ष ज्ञामुराम न्यौपानेले बताउनुभयो।
जिल्ला तथा पालिकास्तरका नेता कार्यकर्ताको प्रतिनिधि मण्डल सहितको सहभागितामा ज्ञापनपत्र पेश गरिएको हो ।
