काठमाडौं । राष्ट्रिय जनमोर्चाका सांसद दुर्गा पौडेलले भारतका विभिन्न क्वारेन्टिनमा नेपालीलाई एक छाक मात्रै खान दिने गरिएको र कतिपय ठाउँबाट अपमानित ढंगले निकालिएको बताउनुभएको छ ।
शुक्रबार सुरु भएको संसदको बजेट अधिवेशमा आफ्नो धारणा राख्दै राजमो उपाध्यक्ष पौडेलले भारतमा समस्यामा रहेका २५ हजारभन्दा बढी नेपाली नागरिकलाई स्वदेश फर्काउन सरकारसँग माग गर्नुभएको छ । सीमा क्षेत्रमा क्वारेन्टिनमा रहेका र भारतका अन्य क्षेत्रमा अफ्ठ्यारोमा परेका २५ हजारबढी नागरिकलाई सुरक्षित रुपमा नेपाल फर्काउन उहाँले आग्रह गर्नुभएको हो ।
त्यस सन्दर्भमा उहाँले उत्तराखण्डको हल्द्वानीस्थित क्वारेन्टिनबाट १७ नेपालीलाई निकालिएको र उत्तरप्रदेशस्थित पलियामा रहेको क्वारेन्टिनमा एक छाक मात्रै खान दिन गरिएकोप्रति सरकारको ध्यानाकर्षण गराउनुभएको छ ।
सांसद पौडेलको सम्बोधनको सम्पादित अंश
‘कोरोना भाइरस विश्वव्यापी महामारीका रुपमा फैलिएको अवस्था छ । यो अवस्थामा मुख्यतय दुई घटना भन्न चाहन्छु । भारतको उत्तराखण्ड हल्द्वानीमा क्वारेन्टिनमा बसेका १७ जना नेपालीहरुलाई त्यहाँबाट अब हामीहरुले तिमिहरुलाई खान दिन सक्दैनौं भनेर निकादिएको अवस्था छ । त्यो सँगै कैलालीको सिमाक्षेत्र पलिया भन्ने ठाउँमा क्वारेन्टिनमा बसेका दुई सय जना नेपाली मजदुरलाई १ छाक मात्र खाना दिएर अब हामीहरुले तिमिहरुलाई खाना दिन सक्दैनौं भनेर सूचना पनि निकालेको अवस्था छ ।
यो त एउटा प्रतिनिधिमुलक घटना हो । भारतमा नेपालीहरुको अवस्था एकदमै दयनीय रहेको छ । जो बेखर्चि छन्, जसको अत्यन्त दयनीय अवस्था छ, सरकारले तिनको डाटा संकलन गरेर तत्काल तिनीहरुलाई आफ्नो देशमा ल्याएर व्यवस्थापन गर्न सभामुख मार्फत सरकारको ध्यानाकर्षण गराउन चाहान्छु ।
सरकारले प्राथकिताका आधारमा नेपालीलाई स्वदेश फर्काउने कुरा गर्यो, त्यो स्वागतयोग्य छ । तर भारतमा रहेका नेपालीहरुको कुरा समेटेको पाइएन । भारतमा झन् खुला सिमानाका भएको देश क्वारेन्टिनमा बसेका नेपालीहरको झनै विचल्ली भएको देखिन्छ । जतिखेर २ हजार मात्र नेपालीहरु सिमानामा थिए सरकारले चाहेको भए राम्रो तरिकाले क्वारेन्टिनमा राख्न सक्थ्यो । पछि ढिलो पनि भयो र असम्वेदनशील पनि भयो त्यो विषयमा ।
अहिले मसँग करिब २५ हजार नेपालीहरुको डाटा फोन नम्बरसहित आएको छ । सभामुख मार्फत सरकारलाई भन्न चाहन्छु त्यो डाटा अनुसार त्यहाँको दूतावाससँग समन्वय गरेर एकिन डाटा संकलन गरी प्राथमिकताका आधारमा बेखर्चि नेपालीहरुलाई स्वदेशमा ल्याएर तिनिहरुको व्यवस्थापन गरियोस् र क्वारेन्टिनमा राखियोस् ।
यो पनि: भारतीय क्वारेन्टिनबाट अपमानित ढंगले निकालिए नेपाली (भिडियो सहित)
यो जटिल अवस्थामा हामीले त्यो समस्याको समाधान गर्नु पर्छ । विश्वभरबाट नेपालीहरु दिर्धकालीनरुपमा स्वदेश फर्किनेवाला छन् । तिनिहरुलाई यहाँ ल्याएर क्वारेन्टिनमा मात्र राखेर समस्याको समाधान हुन सक्दैन । क्वारेन्टिनमा राख्नु तत्कालीन समस्याको समाधान मात्र हो ।
दिर्धकालीन रुपमा उनीहरुलाई आइ पर्ने भोकमरीको समस्यालाई पनि हेर्न जरुरी छ । त्यसको लागि समयमै श्रमसँग जोड्न जरुरी छ । देशलाई उत्पादनको क्षेत्रमा लैजान जरुरी छ । कृषिको क्षेत्रमा लैजान जरुरी छ । बाँझो पल्टेका खेतहरुलाई सरकारले एउटा प्याकेजको रुपमा ल्याउन सक्यो भने उनीहरुलाई श्रमसँग जोडेर काम दिएर त्यो भोकमरीबाट केही हदसम्म बचाउन सकिन्छ ।
स्वास्थ्य उपचारको समस्या भैरहेको छ त्यो समस्यालाई पनि पुर्ति गर्न जरुरी छ । त्योसँगसँगै हामीले जनतालाई पीसीआरद्वारा नै समयमा सबैलाई जाँच्न सकेनौं भने त्यो झन् भयावरुप लिनेछ ।
सरकारले लकडाउन गरेर ठिकै गरेको छ । यो अवस्था एउटा बाध्यात्मक अवस्था हो । यो बाहेक अर्को विकल्प पनि छैन । तर लकडाउनले मात्रै हाम्रो समस्या समाधान हुन सक्दैन । त्यस पछिका समस्या अझ कहाली लाग्दो हुन्छ । त्यसैले सरकारले त्यसलाई पनि मध्यनजर गर्दै जानु पर्छ ।
तत्काल स्वास्थ्य सामाग्रीमा खरिदमा भएका भ्रष्टाचार तथा राहत वितरणमा भएका अनियमितताको कडाईपूर्वक छानबिन गरी दोषिलाई कार्वाहीको दायरामा ल्याउनु पर्छ । जसले यस्तो अवस्थामा पनि स्वास्थ्य सामग्रीमा भ्रष्टाचार गर्छ भने त्यसले अरुमा झन के गर्ला ? त्यसैले त्यसता भ्रष्टाचारीलाई कानुनी दायरामा ल्याएर कडा भन्दा कडा कार्वाही गरियोस् ।
