गोपालप्रसाद भट्टराई, नुवाकोट (अर्घाखाँची) ।
राष्ट्रिय जनमोर्चाले राष्ट्र, राष्ट्रियता, विकास निर्माण र सुशासनसित सम्बन्धित भूमिकास्थान नगरपालिकामा ११ बुँदे ज्ञापनपत्र बुझाएको छ ।
केन्द्रीय सदस्य सागर केसीको नेतृत्वमा २०८१ भदौ ७ गते शुक्रबार गएको १६ सदस्यीय प्रतिनिधिमण्डलले नगरप्रमुख झबिलाल थापालाई सो ज्ञापनपत्र बुझाएको हो ।
ज्ञापनमा सन् १९५० लगायतका विभिन्न राष्ट्रघाती सन्धिसम्झौता खारेज गरिनुपर्ने, सीमा अतिक्रमण एमसिसी विरुद्ध पालिकाले सर्वसम्मत प्रस्ताव पारित गर्नुपर्ने, पालिकामा बढिरहेको बेरुजु तथा अनुत्पादक खर्चलाई नियन्त्रण गर्न माग गरिएको छ ।
त्यसैगरी, ज्ञापनमा माध्यमिक तहमा उपयोगी शिक्षा प्रदान गरी स्वरोजगारी सिर्जना गर्नुपर्ने, पुराना सहकारी व्यवस्थित गरेर मात्र नयाँ सहकारी दर्ता गरिनुपर्ने, सार्वजनिक यातायातमा व्यवस्थापनन गर्न मनलाग्दी भाडा नियन्त्रण गर्नुका साथै पालिकाको आफ्नै बस चलाइनुपर्ने, कालोबजारी, बढ्दो महङ्गी र बिचौलियालाई अन्त्य गर्नुका साथै सुपथ मूल्यका पसल खोल्नुपर्ने माग गरिएको छ ।
सोही प्रकारले कृषिउपजको व्यवस्थापन पालिकाले गर्नुका साथै न्यूनतम दर निर्धारण गरिनुपर्ने, पालिकाभित्रका स्वास्थ्य संस्थामा स्वास्थ्य सामग्री तथा भौतिक पूर्वाधार निर्माणमा ध्यान दिइनुपर्ने, पालिकाले सञ्चालन गर्ने विकास निर्माणलाई दिगो र जनमुखी बनाउन नियमति र प्रभावकारी अनुगमनको व्यवस्था गर्नुपर्ने तथा त्यसका लागि नागरिक सचेतना सञ्चालन गरिनुपर्नेलगायतका माग ज्ञापनमा छ ।
प्रतिनिधिमण्डलमा राजमो अर्घाखाँचीका उपाध्यक्ष गोपाल पौडेल, जिल्ला सदस्यहरू खिमानन्द बेलबासे र हरि आले, भूमिकास्थान नगर समितिका अध्यक्ष हिमलाल बन्जाडे, उपाध्यक्ष चेतनारायण गैरे, सचिव प्रकाश पौडेल, कोषाध्यक्ष कृष्ण सुनार, सदस्यहरू शिव बन्जाडे, उमानन्द गैरे र झविन्द्र चुँदाली, अखिल नेपाल महिला सङ्घकी महासचिव शकुन्तला राना, अखिल नेपाल युवक सङ्घका केन्द्रीय सदस्य ठाकुर पन्थी, जिल्ला अध्यक्ष रेशम विक, मूल प्रवाह अखिल भारत नेपाली एकता समाजका दिनेश पन्थी र गणेश दमासे र राजमो भूमिकास्थान–६ का वडासदस्य रुक्मागत आचार्यको पनि सहभागिता रहेको थियो ।
