गोपालप्रसाद भट्टराई, भूमिकास्थान (अर्घाखाँची) ।
राष्ट्रिय जनमोर्चाका महासचिव मनोज भट्टले युवाजति विदेश पठाएर मुलुकमा ब्रह्मलुट मच्याउनेका विरुद्ध गोलबन्द हुन युवाहरूलाई आग्रह गर्नुभएको छ ।
२०८१ भदौ ४ गते मङ्गलबार अर्घाखाँचीको भूमिकास्थानस्थित पोखेडाँडामा सम्पन्न युवाविद्यार्थीको नगरस्तरीय संयुक्त भेलालाई सम्बोधन गर्दै उहाँले यस्तो आग्रह गर्नुभएको हो ।
राष्ट्रको ढुकुटीमा राज गर्दै मातृभूमि छिमेकीलाई सुम्पिने ठुला दलहरूको आदतले देश अप्ठ्यारोमा परेको महासचिव भट्टको आरोप छ ।
फरक प्रसङ्गमा भूमिकास्थानको चुनढुङ्गा उत्खनन् प्रकरणमा दोषीलाई उम्किन नदिन र निर्दोषलाई नफसाउन उहाँले सरकारको ध्यानाकर्षण गराउनुभएको छ ।
कैयौँ घटनामा सत्तारूढ दलले विपक्षि पार्टीका विरुद्ध पुलिस प्रशासनलाई प्रयोग गर्ने गरेको स्मरण गर्दै महासचिव भट्टले अर्घाखाँचीमा त्यस्तो हुन नदिन सचेत हुनुपर्नेमा जोड दिनुभयो ।
कार्यक्रममा राजमो केन्द्रीय सदस्य सागर केसी, राजमो लुम्बिनी प्रदेश समितिका सल्लाहकार शेरबहादुर विसी, अखिल (छैठौं) का महासचिव सुवास जिसी, अखिल नेपाल युवक सङ्घका केन्द्रीय सचिव कुलराज खनाललगायतले पनि बोल्नुभएको थियो ।
युवालाई विदेशमा बेचेर देशमा रजाईं गर्नेका विरुद्ध युवाविद्यार्थीले निर्णयक आन्दोलको थालनी गर्नुपर्नेमा उहाँहरूको जोड रहेको थियो ।
युवक सङ्घमा आचार्य
भेलाले सुरेश आचार्य अध्यक्ष रहनुभएको १५ सदस्यीय युवक सङ्घको भूमिकास्थान नगर समिति गठन गरेको छ ।
समितिको उपाध्यक्षमा माधव बन्जाडे, सचिवमा झविन्द्र चुँदाली, सहसचिवमा विष्णुप्रसाद भट्टराई र कोषाध्यक्षमा नमकला केसी चयन हुनुभएको छ ।
अखिल (छैठौं) मा चुँदाली
संयुक्त भेलाले प्रकाश चुँदाली अध्यक्ष रहनुभएको १७ सदस्यीय अखिल (छैठौं) को नगर समिति गठन गरेको छ ।
नवगठित समितिको उपाध्यक्ष, सचिव, सहसचिव र कोषाध्यक्षहरूमा क्रमशः अस्मिता थापा, शरिस्मा केसी, विमल केसी र सन्ध्या राना छनौट हुनुभएको छ ।
भूमिकास्थानका १० ओटै वडाबाट युवाविद्यार्थीका प्रतिनिधिको सहभागितामा सम्पन्न उक्त भेलामा अखिल नेपाल महिला सङ्घकी महासचिव शकुन्तला राना, राजमो जिल्ला उपाध्यक्ष गोपाल पौडेल, प्रगतिशील पत्रकार सङ्घका केन्द्रीय सचिव गोपालप्रसाद भट्टराई, प्रगतिशीलकै जिल्ला अध्यक्ष जितेन्द्र खत्री, राजमो भूमिकास्थान नगर अध्यक्ष हिमलाल बन्जाडे, जातीय समता समाजका जिल्ला अध्यक्ष कृष्ण सुनारलगायतको आतिथ्य रहेको थियो ।
कार्यक्रम युवक सङ्घका जिल्ला अध्यक्ष रेसम विकको अध्यक्षता, जिल्ला सदस्य विष्णुप्रसाद भट्टराईको स्वागत मन्तव्य र अखिल (छैठौं) जिल्ला अध्यक्ष जीवन नेपालीको सञ्चालनमा सम्पन्न भएको थियो ।
