काठमाडौँ । राष्ट्रिय जनमोर्चाका केन्द्रीय सल्लाहकार तथा राष्ट्रियसभाका सांसद राजेश विश्वकर्मा (तुलप्रसाद) ले विद्यमान असमान समाजमा समान न्यायले काम नगर्ने बताउनुभएको छ ।
राष्ट्रियसभा बैठकमा आइतबार विशेष समय लिएर मन्तव्य राख्दै उहाँले यस्तो धारणा राख्नुभएको हो ।
राष्ट्रियसभामा संविधान संशोधनको प्रसङ्गमा बोल्दै उहाँले भन्नुभयो– ‘विद्यमान असमान समाजमा समान न्यायले काम गर्दैन । त्यसैले आरक्षण चाहिन्छ ।’
‘कतिपय माननीयहरू भन्नुभएको छ, संविधान संशोधन अग्रगमनको पक्षमा हुने छ’ उहाँले भन्नुभयो– ‘तर बाहिर पत्रपत्रिकामा प्रकाशन भएका समाचारलाई आधार बनाउने हो भने सङ्केत राम्रो देखिन्न ।’
संविधानमा व्यवस्था गरिएको समावेशिता वा आरक्षणलाई हटाउने चर्चा हुनु राम्रो विषय नभएको उहाँको भनाइ थियो ।
‘संविधान संशोधनको सन्दर्भमा समानुपातिक समावेशिता अथवा आरक्षणलाई हटाउनुपर्यो, यसले राम्रो गरेन भन्ने माननीयहरूबाट समेत कुरा आएको छ’ उहाँले भन्नुभयो– ‘समाजमा दलितलगायत विभिन्न समुदाय पिछडिएका छन् । उनीहरूलाई मूल धारमा ल्याउन नै समानुपातिक समावेशिताको व्यवस्था गरिएको हो । यसलाई कायम राखिनुपर्दछ ।’
उहाँले जोड दिएर भन्नुभयो– ‘समाजमा असमानता, विभेद छ । यस्तो अवस्थामा दलितलगायतका समुदायलाई मूल धारमा ल्याउन आरक्षणको आवश्यकता छ ।’
बाढीपहिरोप्रति सजग रहन आग्रह
सम्बोधनको क्रममा सांसद विश्वकर्माले सरकार र स्थानीय प्रशासन बाढीपहिरोजन्य क्षतिका लागि सजग हुनुपर्ने आवश्यकतामा जोड दिनुभयो ।
थामेमा हिमताल फुटेर भएको जनधनको क्षतिको सन्दर्भमा उहाँले भन्नुभयो– ‘थामेमा हिमताल फुटेर आएको बाढीपहिरोमा परी मृत्यु भएका मृतकप्रति श्रद्धाञ्जली व्यक्त गर्दछु: घाइतेहरूको शीघ्र स्वास्थ्यलाभको कामना गर्दछु र हराइरहेका बेपत्ता नागरिकको शीघ्र खोजी गर्न सरकारसित आग्रह गर्दछु ।’
उहाँले थामे बाढीपहिरोले जनता र प्रशासनलाई घचघच्याएको उल्लेख गर्दै त्यसका लागि पूर्वतयारी, सचेतना, सतर्कता समयमै ध्यान दिनुपर्ने आवश्यकतामा जोड दिनुभयो ।
पूर्वतयारी जस्तो सामान्य विषयमा पनि सरकारले पटक पटक ध्यान दिन नसक्नुलाई उहाँले गम्भीर कमजोरीी भएको सङ्ज्ञा दिनुभयो ।
उहाँले भन्नुभयो– ‘बाढीपहिरोजन्य बिपत्को सन्दर्भमा पूर्वतयारी, सचेतना र सतर्कताको सम्बन्धमा बेलैमा रेस्पोन्स हुनुपर्यो ।’
