काठमाडौं । नेपालगन्जमा थप ७ जनामा कोरोना भाइरस पुष्टि भएको छ । यो सँगै कूल संक्रमितको संख्या ८२ पुगेको छ ।
स्वास्थ्य तथा जनसंख्या मन्त्रालयले नेपालगन्जमा थप सात जनामा कोरोनाभाइरस संक्रमण पुष्टि भएको जनाएको छ ।
मंगलवार मन्त्रालयका सहप्रवक्ता डा. समिरकुमार अधिकारीले विज्ञप्ति प्रकासित गरी नेपालगन्जस्थित भेरी अस्पतालको प्रयोगशालामा भएको परीक्षणमा सात जनामा कोरोनाभाइरस संक्रमण पुष्टि भएको उल्लेख गरेका हुन् ।
उनीहरू ९ देखि ५५ वर्ष उमेरका व्यक्ति छन् र तीमध्ये तीन पुरुष र चार महिला छन् । सबैको स्वास्थ्यस्थिति सामान्य भएको मन्त्रालयले जनाएको छ।
सबै जना नेपालगन्ज–८ का निवासी भएको र उनीहरूलाई स्वास्थ्यकर्मीको निगरानीमा राखिएको मन्त्रालयले जनाएको छ।
यसअघि आइतवार नेपालगन्जमा १५ जनामा कोरोनाभाइरस संक्रमण भएको पुष्टि भएको थियो । नेपालगन्जमा मात्र कोभिड–१९ भएका व्यक्तिको सङ्ख्या २३ पुगेको छ । नेपालगन्ज उपमहानगरपालिका–८ जोलहनपुरुवामा भेटिएका सङ्क्रमित व्यक्तिलाई पछ्याउने क्रममा सोही स्थानका अरू २२ जनामा कोरोनाभाइरस देखिएको हो ।
मङ्गलवार सङ्क्रमण पुष्टि भएकामध्ये ती ६० वर्षीय पुरुषको परिवारका सदस्य पनि छन् । नेपालगन्जमा सङ्क्रमण देखिएका व्यक्तिमा सात र नौ वर्षका बालिकासहित ११ महिला र १२ पुरुष छन्।
पहिलो सङ्क्रमित व्यक्तिको परिवार, आफन्त, उनले पढाउने विद्यार्थी र उनको सम्पर्कमा रहेका ९४ जनाको शनिवार र आइतवार स्वाब सङ्कलन गरिएको थियो ।
नेपालगन्जमा सङ्क्रमित व्यक्तिको सङ्ख्या ह्वात्तै बढेको पाइएपछि कोरोनाभाइरस महामारी फैलिन नदिन, सङ्क्रमित व्यक्तिको सम्पर्कमा आएका मानिसको पहिचान गर्न र परीक्षणका लागि नमुना सङ्कलनलाई प्रभावकारी बनाउन मङ्गलवार बिहान ११ बजेदेखि तीन दिनसम्म नेपालगन्जलाई निषेधित क्षेत्र घोषणा गरिएको छ ।
नेपालगन्जमा गत शुक्रवार एक ६० वर्षीय पुरुषमा कोरोनाभाइरस सङ्क्रमण पुष्टि भएपछि उनीसँग सम्पर्कमा रहेका अन्य व्यक्तिको पहिचान गरेर परीक्षण गर्न थालिएको भेरी अस्पताल नेपालगन्जले जनाएको छ । वैशाख ७ गतेदेखि भेरी अस्पतालमा पीसीआर उपकरण सञ्चालनमा आएपछि परीक्षणको दायरा बढाइएको थियो ।
भारतको राजधानी दिल्लीस्थित तबलिगी जमातको कार्यक्रममा सहभागी भएर नेपालगन्ज फर्किएका तीन जनाको पहिचान भएपछि विभिन्न धर्मगुरुको पनि परीक्षण गरिएको थियो । त्यसै क्रममा शुक्रवार पहिलो सङ्क्रमण पुष्टि भएको थियो ।
अहिलेसम्म कर्णाली प्रदेशबाहेक अन्य छवटा प्रदेशमा कोरोनाभाइरस भेटिएको छ । नेपालमा अहिलेसम्म कोभिड–१९ भएर कसैको मृत्यु भएको पुष्टि भएको छैन । संक्रमित मध्ये नेपालमा १६ जना निको भएर घर फर्किसकेका छन् ।
