काठमाडौं । राष्ट्रिय जनमोर्चाका उपाध्यक्ष एवं सांसद दुर्गा पौडेलले संकटको बेला सरकार आफ्ना नागरिक प्रति गैरजिम्मेवार बनेको आरोप लगाउनुभएको छ । सोमबार संघीय संसद अन्तर्गतको राज्यको नीति निर्देशक सिद्धान्त, नीति तथा दायित्वको कार्यान्वयन, अनुगमन तथा मूल्यांकन समितिको बैठकमा पौडेलले देशबाहिर रहेका नेपालीबारे सरकार बेखबर बनेको बताउनुभयो ।
भारतलगायत विश्वका कैयौं देशमा कोरोनाका कारण नेपालीहरुले दुःख पाइरहेका खबर आउँदा सरकारले वेवास्ता गरेको भन्दै आफ्ना नागरिक प्रति जिम्मेवार बन्न पौडेलले सुझाव दिनुभयो ।
‘कुवेतमा रोजगारी गुमाएका पाँच हजार नेपाली घर फर्कने आशामा कति दिनदेखि रोडमा बसिरहेका छन् । भारतमा त्यहाँको सरकारले नेपालीलाई काम गरिराखेको ठाउँबाट धमाधम बोर्डर तिर ल्याइराखेको छ । त्यतातिर सरकारको ध्यान पुगेको खोई ?’ पौडेलले प्रश्न गर्नुभयो, ‘रेमिट्यान्सबाट देश चलाउने सरकारले रेमिट्यान्स पठाउने नागरिकप्रति गैरजिम्मेवार बन्न मिल्छ ?’
संसारभर रहेका आफ्ना हरेक नागरिकको ख्याल गर्नुपर्ने दायित्व सरकारको भएपनि त्यो दायित्वबाट पन्छिन खोजेको सांसद पौडेलको आरोप थियो । ‘हरेक देशमा रहेका आफ्ना नागरिकहरुको अवस्था के छ, सरकारले ध्यान दिनुपर्छ’ यदी कुनै ठाउँमा नेपाली नागरिक संकटमा परेका छन् भने उनीहरुको उद्धार गर्ने जिम्मा नेपाल सरकारको हो ।’
कोरोना भाइरसका कारण समस्यामा परेका नेपालीहरुलाई सम्बन्धित देशमा नै खाने बस्ने व्यवस्थाका लागि विश्व स्वास्थ्य संगठनको प्रोटोकल अनुसार कूटीनितक पहल गर्न र नेपाल आउन चाहनेहरुलाई उद्धार गरेर ल्याउन पनि उहाँले आग्रह गर्नुभयो ।
उहाँले कोरोना संक्रमण फैलन नदिन सरकारले लकडाउन गरेर मात्रै बस्न नमिल्ने बताउनुभयो । लकडाउनकै बेलामा पनि नागरिकको उचित व्यवस्थापन गर्नुपर्ने भन्दै सरकार त्यसमा चुकेको उहाँले बताउनुभयो ।
सरकारले लकडाउनलाई नै सबैथोक ठान्ने भ्रम पालेको पौडेलले आरोप लगाउनुभयो । उहाँले रातह वितरण पारदर्शी बनाउन, स्वास्थ्य परीक्षणको दायरा बढाउन तथा कालोबजारी र महंगी नियन्त्रण गर्न पनि सरकारलाई सुझाव दिनुभयो । यस्तै, संकटको बेला अनियमितता गर्नेहरुमाथि छानबिन गरेर कडा कारबाही गर्न पनि सांसद पौडेलले माग गर्नुभयो ।
सिंहदरबारमा सोमबार बसेको समिति बैठकले नेपालमा कोरोना रोकथामका लागि भएका प्रयास, स्वास्थ्य सेवामा जनशक्तिको अवस्था तथा स्वास्थ्य सामग्रीको वर्तमान अवस्थाका बारेमा स्वास्थ्य मन्त्रालयसँग छलफल गर्ने निर्णय गरेको छ ।
समितिले कोरोना भाइरस रोकथाम र नेपालबाहिर रहेका नेपालीहरुलाई उद्धार गर्नेबारेमा भइरहेको पहलका बारेमा सरकारसँग जानकारी लिने निर्णय गरेको सांसद पौडेलले युगदर्शनलाई बताउनुभयो ।
