डोटी । डोटीको के आई सिंह गाउँपालिकाले राहत वितरणमा अनियमितता गरेको भन्दै स्थानीयले वडा नं ६ र ४ को कार्यालयमा तालाबन्दी गरेका छन् । जनप्रतिनिधिले अनियमित ढंगबाट आफू निकटकालाई राहत दिएको र राहत पाउनुपर्नेलाई छुटाएको भन्दै वडा कार्यालयमा तालाबन्दी गरिएको हो ।
वैशाख १५ गते वडा नं ४ को कार्यालयमा तालाबन्दी गरिएकोमा गाउँपालिकाले त्यस्तै अनियमितता दोहोर्याएपछि बुधबार ६ नं वडा कार्यालयको गोदाममा पनि ताला लगाइएको छ ।
गाउँपालिकाका प्रतिनिधिहरुले हचुवाका भरमा आफू निकटकालाई राहत वितरण गरेपछि ताला लगाउनुपरेको स्थानीयले बताएका छन् । राहत पाउनुपर्ने विपन्न वर्गलाई राजनीतिक आस्थाका आधारमा विभेद गरिएको पनि पीडितहरुले गुनासो गरेका छन् ।
यसैबीच राष्ट्रिय जनमोर्चा डोटीले विज्ञप्ति निकालेर राहत वितरणमा अनियमितता गरिएको भन्दै विरोध गरेको छ ।
‘के आई सिंह गाउँपालिकाले राहत वितरण सम्बन्धी बनाईएको मापदण्ड विपरित आफूखुशी हतारमा नाम लिस्ट तयार पारी उक्त नामावलीलाई छानबिन र काँटछाँट नै नगरी विभिन्न वडामा बितरण गरिएको राहत प्रक्रिया तथा स्थानीय जनसमुदायहरू माथि गरिएको प्रहरी हस्तक्षेप प्रति राष्ट्रिय जनमोर्चा डोटीको गम्भीर आपत्ति तथा निन्दा गर्दछ’ विज्ञप्तिमा भनिएको छ ।
राजमो जिल्ला सचिव केशवनाथ योगीद्वारा हस्ताक्षरित विज्ञप्तिमा राहत वितरण कार्यको छानबिन गरी दोषीमाथि कारबाही गर्न माग गरिएको छ ।
