काठमाडौं । कुवेतमा ५१ जना नेपाली नागरिक कोरोना भाइरसबाट संक्रमित भएका छन् । मंगलबार थप २२ जना संक्रमित भेटिएपछि ५१ जनामा संक्रमण पुष्टि भएको हो ।
कुवेतका लागि नेपाली राजदूत दुर्गाप्रसाद भण्डारीका अनुसार त्यहाँको सरकारले आफ्ना नागरिक सरह नै उपचार गरिरहेको छ ।
मंगलबारसम्ममा कुवेतमा ३४ सय ४० जनामा कोरोना सङ्क्रमण भएको छ । जसमध्ये ११ सय ७६ जना उपचारपछि निको भएका छन् भने २२ सय ४१ जनाको अस्पतालमा उपचार भइरहेको छ । कुवेतमा झण्डै ७० हजार नेपाली कार्यरत छन् ।
खाडीका देश र मलेसियामा रहेका नेपाली दूतावासका अनुसार यी देशमा २०६ जना नेपाली नागरिकमा कोरोना संक्रमण देखिएको छ । जसमध्ये १९७ जनाको अस्पतालमा उपचार भइरहेको छ । ७ जना निको भएर काममा फिरेका छन् भने यूएईमा कोरोनाका कारण दुई जनाको ज्यान गएको छ ।
अहिलेसम्म बहराइनमा १२१, यूएईमा १२, साउदीमा ४, कुवेतमा ५१, कतारमा १५, मलेसियामा ३ जना गरी जम्मा २०६ जना नेपाली श्रमिकलाई कोरोना सङ्क्रमण भएको हो । जसमध्ये साउदीमा तीन, यूएईमा दुई र मलेसियामा दुई गरी ७ जना निको भएर काममा फर्किएका छन् ।
