काठमाडौँ । भारतको उत्तरपूर्वी राज्य मेघालयमा चार जनाको हत्या भएको छ । तीमध्ये तीन जना नेपाली र एक जना स्थानीय आदिवासी समुदायका व्यक्ति रहेको स्थानीय प्रहरीले जनाएको छ ।
मारिनेमध्ये एक जना रवि राईको घर इलाम भएको भनिए पनि अहिलेसम्म उनको घर ठेगाना पत्ता लागेको छैन । स्थानीय प्रहरीले पनि अनुसन्धानबाट प्राप्त कुनै तथ्य प्रहरीले बाहिर ल्याएको छैन ।
घटनास्थल निकै दुर्गम स्थानमा रहेको र प्रहरीले गोप्य तरिकाले अनुसन्धान गरिरहेको कारण पनि थप विवरण प्राप्त हुन समय लागिरहेको नयाँ दिल्लीस्थित नेपाली दूतावासका कन्सुलर एवम् नेपाल प्रहरीका वरिष्ठ प्रहरी उपरीक्षक उमाप्रसाद चतुर्वेदीले बताए ।
मेघालयको पूर्वी जयन्तिया हिल्स जिल्लामा पर्ने उम्प्लेङ बजार पछाडि शनिबार चार शव फेला परेका थिए । त्यहाँको प्रहरी उपरीक्षकको कार्यालयले जारी गरेको विज्ञप्तिअनुसार बिहान साढे ७ बजे टेलफोनबाट शव फेला परेको जानकारी प्राप्त भएको थियो ।
तत्कालै घटनास्थलमा पुगेका अधिकारी र कर्मचारीले हात डोरीले बाँधिएको र शरीरमा धारिलो वस्तुले काटिएका धेरै चोटपटक लागेको अवस्थामा चार जनाको शव फेला पारेका थिए । उनीहरूको हत्या भएको देखिएकाले क्राइम सिन युनिट, मोबाइल फोरेन्सिक र मजिस्ट्रेटको संयुक्त प्रयासमा आवश्यक अनुसन्धान एवम् कारबाही अघि बढाइएको थियो । त्यस क्रममा घटनास्थलबाट प्रमाण सङ्कलन र स्थानीयबाट जानकारी लिने काम गरिएको थियो । त्यसपछि पोस्टमार्टमका लागि सबै औपचारिकता पूरा गरी शवलाई सिभिल अस्पताल खिल्हरियात लगिएको थियो ।
