मेघराज रिष्मेली, टोकियो ।
जापानको तोचिगिसीमा बस्दै आएका एक नेपालीको युवा शेरबहादुर कार्कीको असामयिक निधन भएको छ ।
नेपालमा इटहरीको विराटचोक घर भई हाल तोचिगीसीको आसाहिचोमा पत्नी र छोरीसहित बस्दै आएका शेरबहादुर कार्कीको राति सुतिरहेको अवस्थामा निधन भएको हो ।
जुन २१, २०२४ शुक्रबार साँझ खाना खाएर सकुशल सुतेका कार्की शनिबार बिहान काममा जान मोबाइलको अर्लाम बज्दा पनि नउठेपछि पत्नी उठाउन जाँदा कुनै प्रतिक्रिया नजनाएपछि तत्काल एम्बुलेन्सलाई बोलाएकोमा स्वास्थ्यकर्मीले कार्की जीवित रहेको कुनै सङ्केत नभएको बताएका थिए ।
स्वास्थ्यकर्मीले कार्की जीवित नरहेको घोषणा गरेपछि प्रहरीले आवश्यक अनुसन्धान गरी शवलाई पोस्टमार्टमका लागि अस्पताल लगेको थियो । पोस्टमार्टम रिपोर्टअनुसार कार्कीको मृत्यु हृदयघातका कारण भएको उल्लेख गरिएको छ । हाल उनको सव तोचिगिसीको प्रहरी कार्यालयमा राखिएको छ ।
परिवार र पत्नीले मृतक कार्कीको शव नेपाल पठाउने चाहना राखेको र आर्थिक अवस्था कमजोर भएकाले मृतक कार्कीको पत्नी कल्पना थापा (कार्की) ले आर्थिक सहयोगका लागी जापानवासी सबै नेपाली र विभिन्न सङ्घसंस्था तथा नेपाली दूतावाससँग सार्वजनिक रूपमा आग्रह गरेकी छिन् ।
कल्पना थापा, जापान पोस्ट बैङ्क, खाता नम्बर १४०५०–४९८१९१३१ नेपालमा मृतक कार्कीकी वृद्ध आमाले कान्छो छोराको मुख हेर्ने अन्तिम इच्छा प्रकट गरेको परिवार स्रोतले बताएको छ ।
मृतक कार्की पत्नीको डिपेन्डेन्ट भिसामा थिए । मृतक कार्की साढे दुई वर्षको छोरी र पत्नीसँगै जापानमा बस्दै आएका थिए ।
