काठमाडौं । जनकपुर प्रादेशिक अस्पतालमा कोरोना परीक्षण नेगेटिभ पाइएपछि क्वारेन्टिनबाट घर पठाइएका १४ वर्षे किशोर कोरोना संक्रमित भएको पुष्टि भएको छ । सर्लाहीको धनकौल गाउँपालिका–५ हरकठवाका ति किशोरमा कोरोना भाइरस संक्रमण पोजेटिभ पाइएपछि थप उपचारका लागि उनलाई वीरगञ्ज पठाइएको छ भने गाउँ सील गरिएको छ ।
किशोरलाई बिहीबार राति उपचारका लागि वीरगञ्जस्थित नारायणी उपक्षेत्रीय अस्पतालको आइसोलेसनमा पठाइएको सर्लाहीका प्रमुख जिल्ला अधिकारी मोहनबहादुर जिसीले जानकारी दिनुभयो ।
किशोरको परिवारका पाँच सदस्यलाई धनकौल गाउँपालिकाको क्वारेन्टिनमा राखिएको प्रजिअ जिसीले बताउनुभयो । किशोर बुधबार साँझ क्वारेन्टिनबाट आफ्नो घर गए पनि उनी आफ्नो परिवारका सदस्य बाहेक कसैको सम्पर्ककमा नगएको उहाँले जानकारी गराउनुभयो । गाउँपालिकामा अहिले सुरक्षा व्यवस्था कडा पारिएको प्रजिअ जिसीले बताउनुभयो ।
गत शुक्रबार वैशाख ५ गते आरडीटी रिपोर्ट पोजेटिभ देखिएपछि किशोरलाई जनकपुरधामस्थित प्रादेशिक अस्पतालमा पीसीआर जाँचका लागि लगिएको थियो । त्यहाँ किशोरमा कोरोना संक्रमण नदेखिएपछि वैशाख ७ गते धनकौलको क्वारेन्टिनमा पठाइएको थियो ।
ती किशोरलाई जनकपुरबाट धनकौल पठाएको चार दिनपछि बिहीबार पुनः कोरोना रहेको भन्दै रिपोर्ट आएको हो । टेकुमा गरिएको परीक्षणमा किशोरमा कोरोना संक्रमण पुष्टि भएको बिहीबार सार्वजनिक गरिएको छ ।
लकडाउनको बेला ती किशोर गत चैत २३ गते भारतको राजधानी नयाँदिल्लीबाट रौतहटको गौर हुँदै धनकौल फर्केका थिए । संक्रमित किशोर नयाँदिल्लीस्थित एक ब्याग फ्याक्ट्रीमा काम गर्दै आएका थिए । भारतबाट एक किशोर आएको सूचना पाएलगत्तै प्रहरीले हरकठवास्थित क्वारेन्टिनमा लगेर उनलाई राखेको थियो ।
