खिमराज चालिसे, चन्डिगढ ।
मूल प्रवाह अखिल भारत नेपाली एकता समाज चन्डिगढले मिर्गौलापीडित बालिकालाई करिब तीन लाख सहयोग गरेको छ ।
जुन ११, २०२४ का दिन मूल प्रवाहको मोहाली एरिया समितिका सदस्य सुरेश श्रीपालीको पहलमा सो सहयोग गरिएको हो ।
प्युठान जिल्लाको गौमुखी गाउँपालिका वडा नम्बर ३ धाराखानी रजबारा निवासी नविन्द्र सुनारकी आठ वर्षीया छोरी समीक्षा सुनार पछिल्लो एक वर्षदेखि मिर्गौलापीडित भई भारतको चन्डिगढस्थित पिजिआई अस्पतालमा उपचाररत थिइन् । मूल प्रवाहद्वारा पीडित समीक्षाका लागि जुन ११ सम्म सङ्कलित रकम नेरु दुई लाख पचासी हजार पाँच सय त्रिचालिस (२,८५,५४३।) रुपैयाँ बुझाइएको हो ।
पीडितको आर्थिक अवस्था अति कमजोर रहेको र अत्यधिक उपचार खर्च रहेको अवस्थामा मूल प्रवाह एरिया समितिका सदस्य सुरेश श्रीपालीले गत एक महिना पहिलादेखि आर्थिक सङ्कलन अभियान थालनी गर्नुभएकाे थियो । श्रीपालीको नेतृत्वमा सुरु गरिएको उक्त अभियानलाई सर्वसाधारणले उत्साहपूर्वक सहयोग गरेका थिए ।
मोहाली एरिया सचिव जुना चालिसे, सदस्यहरू सीमा खड्का र शुरेश श्रीपाली एवम् महिला नगर सदस्य सरस्वता भुसालसहितको टिम पिजिआई हस्पिटलमा पुगी जनक सुनारबाट सङ्कलित नेरु ८३,००० र विक्रम सुनारबाट नेरु १४,५०० समेत गरी कुल नगद २,१०,३२५ नेरु सहयोग हस्तान्तरण गरेको हो ।
यसअघि संकलन भएको ७५,२१८ र यसपटकको २,१०,३२५ गरी टोटल २,८५,५४३ नेरु पीडितलाई हस्तान्तरण गरिएको छ ।
समीक्षाको उपचारमा अझै धेरै रकम लाग्न सक्ने डाक्टरहरूले बताएअनुसार आर्थिक अभियान अझै केही समय चल्ने मूल प्रवाहले जनाएको छ ।
