काठमाडौँ । नेकपा (मसाल) ले प्यालेस्टाइनी जनताको मुक्ति आन्दोलनप्रति समर्थन व्यक्त गरेको छ ।
मे १५ का दिन प्यालेस्टाइनी भूमिमा इजरायल देश स्थापना भएको सन्दर्भ जोडेर प्रेसवक्तव्य जारी गर्दै फार्टीले यस्तो समर्थन व्यक्त गरेको हो ।
महामन्त्री मोहनवित्रम सिंहको हस्ताक्षरमा २०८१ जेठ २ गते बुधबार जारी गरिएको प्रेसवक्तव्यमा मे १५, १९४८ का दिन इजरायल देश स्थापना भएसँगै प्यालेस्टाइनी जनता देशविहीन बनेको उल्लेख छ ।
इजरायलले अमेरिकी साम्राज्यवाद र युरोपेली साम्राज्यवादको सहयोगमा प्यालेस्टाइनमा नरसंहार मच्याइरहेको बताउँदै पार्टीले सो युद्धले तेस्रो विश्वयुद्धको रूप लिने सक्ने वा त्यसबाट सम्पूर्ण मानव समुदायको नै विनाश हुन सक्ने चेतावनी दिइएको छ ।
यस्तो छ, प्रेसवक्तव्यको पूर्ण पाठ :
“मे १५ प्यालेस्टाइनी जनताका लागि कालो दिन हो । मे १५, १९४८ का दिन विश्व साम्राज्यवादको योजना, सहयोग र समर्थनमा प्यालेस्टाइनी भूमिमा इजरायल नामका नयाँ देश स्थापना गरिएको थियो । त्यसभन्दा अगाडि विश्वको मानचित्रमा इजरायल नामको कुनै देश थिएन । सन् १९४८ मा मात्रै इजरायल नामक देशको स्थापना भयो र प्यालेस्टाइनीलाई आफ्नो भूमिबाट विस्थापन गर्न सुरु गरियो । अहिले प्यालेस्टाइनी जनता आफ्नै भूमिका देशविहीन बनेका छन् ।
गत अक्टोबर २०२३ देखि इजरायलले फेरि प्यालेस्टाइनी जनताको नरसंहार गरिरहेको छ । हमासको नाममा इजरायलले यतिखेर अमानवीय र बर्बर आक्रमण गरिरहेको छ । इजरायलको उक्त भर्त्सनायोग्य कामलाई अमेरिकी साम्राज्यवाद र युरोपियन साम्राज्यवादको सहयोग र समर्थन प्राप्त छ । प्यालेस्टाइनमाथि लादिएको यो युद्धले एकातिर वर्तमान विश्व तेस्रो विश्वयुद्धतर्फ जाने र अर्कोतिर, सम्पूर्ण मानव समुदायको नै विनाश हुने खतरा बढेर गएको छ ।
यस प्रकारको गम्भीर विश्व परिस्थितिमा हामी युद्धोन्मत्त इजरायली साम्राज्यवाद तथा त्यसको पक्षमा उभिएका अमेरिकी साम्राज्यवाद तथा युरोपियन साम्राज्यवादको कडा शब्दमा विरोध गर्दछौँ । प्यालेस्टाइनी जनताको राष्ट्रियता र सार्वभौमिकताको पुनर्स्थापना हुनुपर्ने माग गर्दछौँ । हाम्रो पार्टी प्यालेस्टाइनी जनताका मुक्ति आन्दोलनको समर्थन गर्दै इजरायली साम्राज्यवादसहित विश्व साम्राज्यवादको विरोध एवम् भर्त्सना गर्दछ ।”
