काठमाडौं । काठमाडौंको टेकुस्थित शुक्रराज ट्रपिकल तथा सरुवा रोग अस्पतालका डाक्टर शेरबहादुर पुनलाई स्वास्थ्य मन्त्रालयले कारबाही गरेको विषयमा ब्यापक आलोचना भएपछि स्वास्थ्य तथा जनसंख्या मन्त्रालयले मुख खोलेको छ ।
कोरोना भाइरस (कोभिड–१९) बारे जनचेतना जगाइरहेका डा. पुनलाई स्वास्थ्य मन्त्रालयले स्पष्टीकरण सोधेको विषय सञ्चार माध्यममा आएको आएको छ । तर, त्यो स्पष्टीकरणमा के छ भन्ने स्पष्ट भएको छैन । कोरोना भाइरसका बिरामीको उपचारमा अग्रपंक्तिमा खटिएका र २४ सै घण्टा जनताको सेवामा समर्पित डाक्टरको मुख थुन्न मन्त्रालयले स्पष्टीकरण सोधेको भन्ने विषयलाई लिएर सामाजिक सञ्जालमा व्यापक आलोचना भएको छ ।
कतिपयले स्वास्थ्यमन्त्री भानुभक्त ढकालको राजीनामासमेत मागेका छन् । सो विषय सामाजिक सञ्जालमा व्यापक बनेपछि स्वास्थ्य तथा जनसंख्या मन्त्रालय आफैंले आफ्नो आधिकारिक फेसबुक पेजमार्फत स्पष्टीकरण दिएको छ ।
मिनिस्ट्री अफ हेल्थ एन्ड पपुलेसन फेसबुक पेजमा ‘मिति २०७७ वैशाख ६ गते स्वास्थ्य तथा जनसंख्या मन्त्रालयको सूचना’ जारी गर्दै भनेको छः
‘कोभिड–१९ को सन्दर्भमा स्वास्थ्य तथा जनसंख्या मन्त्रालयले कार्यरत स्वास्थ्यकर्मीहरूलाई कामको सिलसिलामा मन्त्रालय वा अन्तर्गतका जुनसुकै निकायमा काम गर्न खटाई संक्रमितहरूको स्वास्थ्य उपचार गराइरहेको छ । यसै सिलसिलामा शुक्रराज ट्रपिकल तथा सरुवा रोग अस्पतालमा कार्यरत डा। शेरबहादुर पुनलाई मन्त्रालयमा बोलाइएकामा केही पत्रपत्रिका तथा सामाजिक सञ्जालमा सत्य तथ्य बंग्याई माननीय स्वास्थ्य तथा जनसंख्या मन्त्रीज्यूको नाम समेत मुछि अनर्गल तथा दुष्प्रचार गर्ने कार्य भएकामा यस मन्त्रालयको गम्भीर ध्यानाकर्षण भएको छ ।
कोभिड–१९ का सन्दर्भमा जोसुकै र जुनसुकै स्वास्थ्यकर्मीलाई आवश्यकतानुसार मन्त्रालयबाट खटाउने कार्य भैरहेको छ र यस्ता स्वास्थ्यकर्मीलाई सरकारले सतप्रतिशत भत्ता र २५ लाखको बिमासमेतको व्यवस्था गरेको छ । यस सन्दर्भमा सत्य तथ्य नबुझिकन अनर्गल प्रचार प्रसार वा लेख लेखाउने कार्य नगर्न नगराउनु हुन सचेत गराइन्छ ।’
