मेघराज रिष्मेली, जापान ।
जापान नेपाली एकता समाज क्षेत्रीय समिति कान्साईको आयोजनामा एक सय पैतिसौँ मजदुर दिवस ओसाका स्थित बासुरी रेस्टुरेण्टको हलमा मनाइएको छ ।
अखिल नेपाल महिला सङ्घकी कोषाध्यक्ष ऋतु केसीको प्रमुख आतिथ्यमा २०८१ वैशाख १९ गते बुधबार उपस्थितिमा उक्त कार्यक्रम सम्पन्न भएको हो ।
कार्यक्रममा प्रमुख अतिथि केसी, एकता समाजका महासचिव तेजेन्द्र क्षेत्री र सल्लाहकार यामलाल सापकोटाले मजदुर दिवसको इतिहासको महत्त्व र जापानमा नेपाली मजदुरको अवस्थाको विषयमा मन्तव्य राख्नुभएको थियो ।
मन्तव्यको क्रममा उहाँहरूले जापानस्थित नेपाली मजदुरको पहुँच, मजदुर सङ्गठन र ट्रेड युनियनसम्म नभएको साथै यसप्रति उल्लेखनीय प्रयास पनि नभएको सन्दर्भ जोडनुभएको थियो ।
कार्यक्रममा अन्तर्राष्ट्रिय नेपाली एकता समाजका उपाध्यक्ष हेमलाल गौतम, एकता समाजका सल्लाहकार नन्दु शर्मा, भीम केसी, कोषाध्यक्ष छन्द सापकोटा, नौमती बाजा समूहका अध्यक्ष गोपाल खत्री, कलाकार खिम खरेललगायतको उपस्थिति रहेको थियो ।
जापान नेपाली एकता समाज कान्साई क्षेत्रका अध्यक्ष गोपालकृष्ण सापकोटाको अध्यक्षता, सचिव मेघराज रिष्मेलीको सञ्चालन र उपाध्यक्ष भूवन सापकोटाको स्वागतमा उक्त कार्यक्रम सम्पन्न भएको थियो ।
