खिमराज चालिसे, चन्डिगढ (भारत) ।
मूल प्रवाह अखिल भारत नेपाली एकता समाज रोपड नगर समितिका संस्थापक सदस्य एवम् निवर्तमान नगर अध्यक्ष ओमप्रकाश सापकोटालाई बिदाइ गरिएको छ ।
औपचारिक कार्यक्रममाझ अप्रिल ४, २०२४ का दिन मूल प्रवाहको रोपड नगर समितिले उहाँलाई बिदाइ गरेको हो ।
बिदाई समारोहमा सापकोटा दम्पतीलाई केन्द्रीय सचिव एवम् सुदूर पश्चिमोत्तर क्षेत्रीय अध्यक्ष प्रेम सापकोटाले अबिर लगाएर सम्मान गर्नुभएको थियो । त्यसपछि नगर समितिको तर्फबाट स्मृतिचिह्न र प्रमाणपत्र प्रदान गरिएको थियो ।
सो अवसरमा जनजाति विभागका क्षेत्रीय संयोजक बिलबहादुर गुरुङ, मूल प्रवाहका सुदूर पश्चिमोत्तर क्षेत्रीय सदस्य शिवलाल लामिछाने, राजमो नवलपुरका छविलाल सापकोटा, क्षेत्रीय सदस्य खगि थापा, महिला क्षेत्रीय सदस्य मन्जु थापालगाएतको आतिथ्य रहेको थियो ।
कार्यक्रममा नगर समितिका लालबहादुर थापा थापा, रक्तिम नगरकी रूपा कार्की, विद्यार्थी सङ्घकी प्रतीक्षा थापा, परिवारका सदस्य टीकाराम पौडेललगाएतले सम्बोधन गर्नुभएको थियो ।
स्वदेशमा गएर राष्ट्रिय जनमोर्चासँग आबद्ध भएर आन्दोलनमा होमिने प्रतिबद्धतासाथ सभामा ओमप्रकाश सापकोटाले सम्वोधन गर्नुभएको थियो ।
कार्यक्रम भक्तबहादुर थापाको अध्यक्षतामा तथा मदन थापाको सञ्चालनमा सम्पन्न भएको थियो भने स्वागत भीमबहादुर कार्कीले गर्नुभएको थियो ।
सन् १९९० देखि मूल प्रवाहको सदस्यता लिएर विभिन्न जिम्वेवारी निभाउँदै आउनुभएका सापकोटा र महिला नगर सदस्य टीकादेवी सापकोटालाई बिदाइ गरिएको थियो।
बागलुङ जैमीनी नगरपालिका दमेकमा बुबा लीलाधर सापकोटा र आमा जयकला सापकोटाको कोखबाट जन्मिएका सापकोटा हाल नवलपुर जिल्लाको गैँडाकोट नगरपालिका–७ निवासी हुनुहुन्छ ।
