काठमाडौँ । अखिल नेपाल शिक्षक संघले एसइई तथा कक्षा ११ र १२ का विद्यार्थीसित स्वअध्ययनमा लाग्न आग्रह गरेको छ । शिक्षक संघका महासचिव चक्रपाणि पौडेलको हस्ताक्षरमा २०७६ चैत्र २४ गते जारी प्रेस वक्तव्य मार्फत् यस्तो आग्रह गरिएको हो ।
कोरोना भाइरसको संक्रमणका कारण देखाउँदै सरकारद्वारा एसइई तथा कक्षा ११ र १२ को परीक्षा स्थगित गरिएको सन्दर्भमा शिक्षक संघले यस्तो आवश्यकतामा जोड दिएको छ ।
वक्तव्यमा सम्पूर्ण विद्यार्थीलाई अनुकूल परिस्थिति निर्माण नभएसम्म परीक्षा सुचारु नहुने भएकाले तबसम्म घरमै बसी स्वअध्ययन र स्वअभ्यासमा लाग्न आग्रह गरेको छ । त्यस्तै, वक्तव्यमा नेपाल टेलिभिजनमा विद्यार्थीका लागि शैक्षिक कार्यक्रमसमेत प्रसारित भइरहेकोमा त्यसबाट लाभान्विन हुन पनि आग्रह गरिएको छ ।
महासचिव पौडेलको वक्तव्यमा पहिलो संक्रमण देखिएको ७४ दिनसम्म पनि जम्मा नौ जना मात्र संक्रमणित हुनु, यस अवधिमा कसैको ज्यान नजानु र सरकारले देशव्यापी लकडाउन घोषणा गर्नुलाई स्वागतयोग्य कदम बताइएको छ ।
त्यसैगरी, कोरोना संक्रमणसित सम्बन्धित स्वास्थ्य सामग्री खरिदमा कमिसन(भ्रष्टाचारको विषय प्रकट हुनु, संक्रमण आशंकितको न्यून संख्यामा परीक्षण हुनु, संक्रमितको उपचार व्यवस्थित नहुनु, कमिसन÷भ्रष्टाचारसम्बन्धी समाचार ह्याकिङ हुनु, स्वास्थ्य सामग्री खरिदमा सेनालाई अघि सारेर सरकारले नैतिक शक्ति गुमाउनु र भारतबाट फर्केका अलपत्र नेपालीको समयमै उद्धार गर्न नसक्नु सरकारको कमजोरी भएको बताइएको छ ।
वक्तव्यमा कोरोना संक्रमणको सतर्कतास्वरूप साबुनपानीले हात धुन, जमघट नगर्न, शारीरिक दुरी कायम गर्न, सरकारले जारी गरेको स्वास्थ्यसम्बन्धी निर्देशनको पालना गर्न, संकटमा परेकालाई मानवीय हिसाबले सहयोग गर्न तथा उच्च मनोबलका साथ संक्रणको विरुद्ध लाग्न आम जनतासित अपिल गरिएको छ ।
