काठमाडौँ । अखिल नेपाल किसान महासङ्घ (अप्फा) ले राहत वितरणमा भएको अनियमितता रोक्न सरकारसित माग गरेको छ । रौतहट जिल्लामा राहत वितरण गर्दा राजनीतिक आधारमा अनियमितता भइरहेको उदाहरण प्रस्तुत गर्दै किसान महासङ्घले यस्तो माग गरेको हो ।
२०७६ चैत्र २३ गते किसान महासङ्घका अध्यक्ष भैरवराज रेग्मीको हस्ताक्षरमा जारी प्रेस वक्तव्यमा यस्तो माग गरिएको छ । किसानका उत्पादन नष्ट भइरहेकोमा प्रभावकारी योजना ल्याउन, देशविदेशका नेपाली मजदुरका लागि राहत योजना ल्याउन र लकडाउनलाई प्रभावकारी रूपमा कार्यान्वयन माग गरिएको सो वक्तव्यमा अगाडि भनिएको छ–
“रौतहट जिल्लामा सुकुम्बासी, कृषि मजदुर र कारखाना मजदुरमाझ राहत वितरणमा ठुलो बदमासी भइरहेको रिपोर्ट आइरहेका छन् । विशेष गरेर पालिकास्तरमा निर्वाचित जनप्रतिनिधिले मजदुर र सुकुम्बासीको नाममा आफ्ना कार्यकर्तालाई पोस्ने काम भइरहेको रिपोर्ट प्राप्त भइरहेका छन् । विशेष गरेर यस प्रकारको राहत (चामल, दाल, साबुन, मास्क र औषधि छर्ने काम) धनीमानीलाई वितरण गरिएको, विपक्षमा भोट हालेको भनेर राहतबाट वञ्चित गरिएको समाचार प्राप्त भइरहेको छ । यति मात्र होइन, कोरोना भाइरसको यो विश्वव्यापी महामारीमा सरकारी तबरबाट नै अनियमितता, भ्रष्टाचार तथा राजनीतिकरण हुनु नेपालीलाई महामारीको भूमरीमा धकेल्ने काम ज्यादै निन्दनीय काम हो ।
रौतहट जिल्ला एउटा प्रतिनिधि मात्र हो । यस्ता विवरण विभिन्न जिल्लाबाट आइरहेका छन् । केन्द्रीय सरकारभित्र पनि भ्रष्टाचार, अनियमितता र यस महामारी विरुद्ध प्रभावकारी भूमिका खेल्न नसकिरहेको समाचार आइरहेको छ । मानवजातिको साझा दुश्मन कोरोना भाइरसको विरुद्ध सबै एकजुट भएर लाग्नुपर्नेमा यस प्रकारको राजनीतिकरण विरुद्ध अखिल नेपाल किसान महासङ्घ (अप्फा) घोर भत्र्सना गर्दै सरकार प्रभावकारी रूपमा प्रस्तुत हुन र सबै शक्ति एकजुट भई यस महामारीको विरुद्ध एक हुन अपिल गर्दछ ।
अहिले एकातिर, किसानका उत्पादन खेतबारीमै सडिरहेका छन् भने अर्कातिर, उपभोक्ताले चर्को मूल्य तिरेर पनि कृषि उत्पादन (तरकारी, फलफूल, दुध, मासु) किन्न पाइरहेका छैनन् । पशुपन्छीपालक किसानलाई दाना, घाँस, परालको आपूर्ति भइरहेको छैन । पोल्ट्री व्यवसायी कुखुरा, अण्डा खाल्टोमा पुर्न बाध्य छन् । केही हप्तापछि हुने भोकमरी टार्न, किसानलाई उत्पादनमा लागिरहने योजना प्रभावकारी रूपमा ल्याइएको छैन ।
राज्यमा बसेका सीमित व्यक्तिले मात्र यस महामारीका विरुद्ध चालिरहेको कदम प्रभावकारी भएको देखिँदैन । मास्क, स्यानिटाइजर, ¥यापिड टेस्ट, अस्पतालको व्यवस्था, डक्टरको सुरक्षा आदि संवेदनशील प्रश्न छन् । तिनीहरूलाई क्रमशः व्यवस्थित गर्न, उक्त कार्यलाई युद्धस्तरमा अगाडि बढाउन देशका सम्पूर्ण शक्ति परिचालन गराउन सकिरहेको छैन । अखिल नेपाल किसान महासङ्घ (अप्फा) लाखौँ श्रमिक (देश तथा विदेश) हरूलाई राहतको योजना तुरुन्त ल्याउन र देशका सम्पूर्ण साधनश्रोत र सबै शक्तिलाई परिचालन गर्न माग गर्दछ ।
कोरोना भाइरस नयाँ प्रकारको भाइरस भएकाले यसका विरुद्ध कुनै औषधि, भ्याक्सिन निर्माण भइसकेको छैन । त्यसका लागि वैज्ञानिहरू अन्तर्राष्ट्रिय रूपमा लागिरहेका छन् । यस भाइरसलाई जित्नु भनेको लकडाउन (बन्दाबन्दी) मा आपसी दुरीमा बस्नु नै सर्वोत्तम उपाय हो । यसका लागि विश्व स्वास्थ्य सङ्गठनको मापदण्डलाई मानेर हामीले यस महामारीको युद्धलाई जित्न सक्छौँ । विश्वका सम्पूर्ण देशहरूले यसको अनुशरण गर्दै गइरहेका छन् । राज्यले पनि लकडाउनलाई प्रभावकारी रूप दिने व्यवस्था गर्न र हामी नेपालीले यसलाई कठोरपूर्वक अनुशरण गरेर बस्न अपिल गर्दछौँ ।”
