सुवास जिसी

केही दिन यता प्रधानमन्त्रीको सचिवालयका हर्कतहरु हेर्दा त्यो खाली मुर्ख तर भ्रष्टहरुको समूह जस्तो देखिन्छ । प्रधानमन्त्रीको सचिवालयमा बस्नेहरुले र प्रधानमन्त्रीको कामको व्यवस्थापन गर्ने भन्दा पनि भ्रष्टाचार र बदमासी गर्नेहरुको संरक्षण र उच्चस्तरमै अनियमिततालाई वैधानिकता दिने काम गरिरहेका छन् ।

केही दिन पहिले स्वास्थ मन्त्रालयले चीनसँग स्वास्थ्य सामाग्रीहरु खरिद गर्दा करोडौं रुपैयाँ भ्रष्टाचार भएको समाचारहरु तथ्य सहित बाहिर आए । समाचार अनुसार चीनसँग झण्डै ५० करोड महँगोमा स्वास्थ्य सामाग्रीहरु खरिद गर्न विचौलियाको काम गर्ने उपप्रधानमन्त्री इश्वर पोखरेलका को छोरा, प्रधानमन्त्रीको प्रमुख सल्लाहकार विष्णु रिमालको छोरा, स्वास्थ्यमन्त्री, पर्यटनमन्त्री र सचिवालयको मिलोमतोमा ओम्नि ग्रुपलाई अवैधानिक रुपमा समान खरिद गर्ने जिम्मा दिइएको थियो ।

खरिद प्रक्रियामा भ्रष्टाचार भएका तथ्यहरु बाहिर आएपछि जनस्तरवाट त्यसको व्यापक विरोध भयो । त्यतिन्जेल प्रधानमन्त्रीलाई सचिवालयले ढाँटी रहेको थियो । भ्रष्टहरुको सचिवालयले स्वास्थ्यमन्त्रीको संरक्षणमा लामा लामा लेखहरु प्रकाशित गर्यो । यतिसम्म कि स्वस्थ्यमन्त्री भानुभक्त ढकालको संरक्षण गर्न रविन्द्र अधिकारीलाई जोडेर ‘इमोस्नल ब्ल्याकमेलिङ’ गर्नसम्म भ्याइसकिएको थियो ।

चौतर्फी विरोध पछि प्रधानमन्त्रीको ठाडो आदेशमा खरिद प्रकृया बन्द भयो । भ्रष्ट सचिवालयको ढाकछोप केही दिन पनि टिकेन । सचिवालयले प्रश्न उठाउनेहरुलाई लेखेको थियो ‘फाटेको जालले छेकेको छेकेपनि छर्लङ्गै देखेको ।’ नभन्दै सचिवालयको जालो उदाङो भयो । धोती फुस्कियो । मुखमा छिर्नै आँटेको चारो फुत्कियो ।

त्यसपछि चारो फुत्किएको रिसले चुर भएको सचिवालय सुरुमा खरिद प्रकृयामा भ्रष्टाचार हुन थालेको न्युज राख्ने काठमाडौ प्रेस अनलाइनमाथि जाइलाग्यो । अनलाइनबाट भ्रष्टाचार सम्बन्धी समाचार हटाउनको लागि सचिवालयले धम्की दियो । अर्को दिन काठमाडौं प्रेस अनलाइनबाट एकाएक समाचार हट्यो ।

समाचार हटेपछी पत्रकार महासंघले वक्तव्य जारी गरेर सरकार र सचिवालयको विरोध गर्यो । त्यसको केही समयपछि फेरि सचिवालयवाट पत्रकार, अनलाइन, मिडिया र पत्रकार महासंघ समेतलाई धम्की दिएर फेसवुकमा प्रधानमन्त्रीको प्रेस सल्लाहकारको एकाउन्टबाट पोस्ट गरियो । सचिवालयले त्यसमा संलग्नता नभएको दलिल पेश गर्‍यो । त्यसको केही समय पछि नै सत्य खुल्यो । त्यसरी अनलाइन ह्याक गरेर न्युज हटाउने अरु कोही नभएर प्रधानमन्त्री कै सूचना प्रविधी सल्लाहकार असगर अलि पो रहेछन् ।

यसरी अहिले प्रधानमन्त्रीको सचिवालय मुखमा पर्नै आँटेको ५० करोड फुत्केको झोंकमा पागल बनिरहेको छ । हरेक दिनजसो कुनै न कुनै काण्ड गरेर सचिवालयले तमासा देखाइरहेको छ । उता प्रधानमन्त्री अस्वस्थ भएर सुतिरहेका छन् भने देश कोरोनाले सुतिरहेको छ । यही मौका छोपेर भ्रष्टहरुले तमासा देखाइरहेका छन् ।

अचम्म छ, यी भ्रष्टका आसेपारेहरुले के सोच्दै छन् रु मानिस यति धेरै भ्रष्ट र पाखण्डी कसरी बन्न सक्छ रु कोरोनाका कारण जनतालाई घर भित्र थुनेर राख्नुपरेको छ । बाहिर यिनीहरुले कताबाट सुको मोहर झार्न सकिन्छ भनेर र्‍याल तप तप चुहाइरहेका छन् । केही गरि कोरोना लागे जनताले केही उपचार पाउनेवाला छैनन् ।

यिनीहरुले गरेको तयारी, निर्माण गरिएका भनिएका क्वारेन्टिन, औषधि, अस्पताल यी सबै कुरा यिनीहरुका भ्रष्टाचार गर्ने माल बाहेक केही होइनन् । आफ्नी आमालाई कोरोना लागेर मरिन भने पनि यिनिहरुले किन्ने कात्रोमा समेत भ्रष्टाचार गर्नेछन् ।

बाँकी देश र जनताको कुरा त्यो त धेरै धेरै टाढा कति टाढा र कोसौंको कुरा ! त्यसैले सरकार छ भनेर कसैले नसोचौं बरु जोगिन सकिन्छ भने कोरोनावाट बच्ने सबै सावधानी अपनाऔं ।