काठमाडौं । बेल्जियमबाट कतार हुँदै नेपाल आएकी बागलुङकी १९ वर्षीया युवतीमा कोरोना संक्रमण भेटिएको छ । यो सँगै नेपालमा कोरोना संक्रमितको संख्या पाँच पुगेको छ ।

उपत्यकाभन्दा बाहिर फेला परेको यो दोस्रो संक्रमण हो । उनी यही चैत ४ गते कतार एयरवेजको क्युआर ६५२ विमानबाट नेपाल आएकी थिइन्।

हाल बागलुङ नगरपालिकास्थित आफ्नै घरमा रहेकी उनको धौलागिरी अस्पतालमा नमुना संकलन गरिएको थियो । उनी नमूना संकलपछि पनि घरमै बस्दै आएकी थिइन् ।

उनीसँगै विमानमा आएकी अर्की युवतीमा चैत १० गते कोरोना भेटिएको थियो । उनी अहिले टेकुस्थित शुक्रराज ट्रपिकल तथा सरुवा रोग अस्पतालमा उपचार गराइरहेकी छन् ।

शुक्रबारमात्रै धनगढीका ३४ वर्षीय युवामा कोरोना भाइरसको संक्रमण भेटिएको थियो । उनको सेती प्रादेशिक अस्पतालमा उपचार भइरहेको छ ।