बूढानीलकण्ठ नगरपालिका ठुलो र धेरै जनसंख्या भएको नगरपालिका हो । नगर क्षेत्र अन्तर्गत काँठदेखि मुख्य शहरी क्षेत्रसमेत पर्दछ । काठमाडौं उपत्यका भित्रको घना जनसंख्या भएको नगरपालिका भएका कारण लकडाउनको अवधिमा कतिपय समस्या हुन सक्छन् । तर, ति सबै समस्यासँग जुध्न नगरपालिका तयार छ ।

लकडाउनको अवस्था लामो समयसम्म रह्यो भने खाद्यान्न लगायत दैनिक उपभोग्य वस्तुको अभाव हुनसक्छ । तर, अहिले नै खाद्यान्न तथा ग्यासलगायत दैनिक उपभोग्य वस्तुको अभाव भएको हामीले महसुस गरेका छैनौं । यदी अभाव हुने अवस्था आएमा पनि त्यसका लागि हामीले अहिलेदेखि नै तयारी थालेका छौं ।

सबै वडाहरुमा खाद्यान्नका ठुला पसलहरु के कति छन्, तिनको सूची बनाउन लागेका छौं । ति पसलहरुमा मौज्दात के कति बाँकी छ, बाहिरबाट ढुवानी कसरी भइरहेको छ, ढुवानीमा कुनै समस्या छ कि ? त्यसबारे बुझ्ने काम भइरहेको छ । यदी ढुवानीमा समस्या छ भने नगरपालिकाले कसरी सहयोग गर्न सक्छ भन्नेबारे पनि हामीले छलफल थालेका छौं ।

यदी, नगरबासीलाई पसलसम्म पुगेर दैनिक उपभोग्य वस्तु खरिद गर्न सक्ने अवस्था भएन भने हामीले टोल टोलसम्म वा घरघरै पुर्याएर पनि सामान वितरणको व्यवस्था गर्नेछौं । तर, अहिले नै घर घरै खाद्यान्न वा ग्यास जस्ता वस्तु पुर्याउनुपर्ने आवश्यकता देखिएको छैन । पसलहरु खुलेका छन् । सामान खरिद बिक्री भइरहेको छ । केही असहजताका वावजुद मानिसहरुले आफूलाई आवश्यक पर्ने सरसामाग्री संकलन गरिरहेका छन् ।

बूनपा–६ स्थित ‘एकल महिला सेवा केन्द्र (डब्लुएचआर)’ को छहारी भवन । जहाँ ५० शय्याको क्वारेन्टिन बनाइएको छ ।

नगर क्षेत्रमा दैनिक ज्यालादारी गरेर खाने कतिपय मानिसहरुलाई यस्तो परिस्थितिमा बढी असहज हुन सक्छ । उनीहरुलाई नगरपालिकाले मद्दत गर्नुपर्ने पनि हुनसक्छ । सामान्यतया त्यसखाले मजदुरहरुको संख्या न्युन नै छ । तैपनि उनीहरुले केही दिनको गर्जो त घरभेटी वा साथीभाइसँग मागेर पनि टार्छन् । तर, लामो समयसम्म त्यो गर्न सम्भव हुँदैन । त्यसका लागि वडा समितिहरु वा टोल विकास संस्थासँग सम्पर्क गर्न हामीले सबैसँग आग्रह गरेका छौं । त्यहाँ सिधै सम्पर्क गर्न नसके घरभेटीमार्फत सम्पर्क गर्न सकिन्छ ।

बूढानीलकण्ठ नगर क्षेत्रमा अहिलेसम्म कोरोनाबाट संक्रमित व्यक्ति भेटिएका छैनन् । यदी कोही संक्रमित भएको आशंका देखिएमा वा विदेशबाट आएकाहरुलाई छुट्टै राख्नका लागि हामीले नगरपालिकाको वडा नं ६ मा ‘एकल महिला सेवा केन्द्र (डब्लुएचआर)’ को छहारी भवनमा ५० शय्याको व्यवस्था मिलाएका छौं । यदी त्यो स्थान अपुग भएमा यहाँका कतिपय विद्यालयहरुलाई आग्रह गरेका छौं । केही विद्यालयहरुले आफ्ना भवन क्वारेन्टिन बनाउन दिने घोषणा पनि गरेका छन् ।
स्वास्थ्य उपचारका लागि काठमाडौंकै नगरपालिका भएको हुनाले त्यति असहज अवस्था छैन । संक्रमित भेटिएमा तत्काल अस्पताल पुर्याउन सकिन्छ ।

बूनपा–१० बालुवाखानीस्थित फेरिल्याण्ड इन्टरनेशनल स्कुल भवन । यो भवन क्वारेन्टिन बनाउन दिने विद्यालयले घोषणा गरेको छ ।

लकडाउनको अवस्थामा फोहोर मैलाको व्यवस्थापन गर्न अलि असहज छ । सरसफाईका कर्मचारीहरुको पनि स्वास्थ्यप्रति संवेदनशील हुनुपर्ने कारणले हामीले उहाँहरुलाई काममा खटाउन सकेका छैनौं । त्यसकारण सबै नगरबासीहरुलाई यो अवस्थामा फोहोर मैलाको उत्सर्जन कम गर्न र घरबाहिर ननिकाल्न आग्रह गर्दछौं ।

कोरोना भाइरसको संक्रमणबाट बच्ने सबैभन्दा उत्तम उपाय भनेकै संक्रमित व्यक्तिहरुको सम्पर्कमा नजाने हो । हामीलाई को संक्रमित छ भन्ने सहजै थाह हुँदैन । त्यसकारण अनावश्यक घरबाहिर ननिस्कौं । भिडभाडमा नजाऔं । सरसफाईमा विशेष ध्यान दिऔं ।

यो असहज परिस्थितिलाई हामी सबै मिलेर पार लगान आवश्यक छ । त्यसकारण सबै नगरबासीहरुसँग हाम्रो आग्रह छ, लकडाउनको पूर्ण पालना गरौं । केही अप्ठ्यारो अवस्था भएमा नजिकको वडा कार्यालय वा टोल विकास संस्थासँग सम्पर्क गरौं । नगरपालिका यहाँहरुको साथमा छ ।
(बूढानीलकण्ठ नगरपालिकाका मेयर उद्धव खरेलसँग कुराकानीमा आधारित)