काठमाडौं । राष्ट्रिय जनमोर्चाले कोरोना भाइरसको संक्रमण फैलन नदिन सरकारले चालेका कमदको स्वागत गरेको छ । सोमबार सरकारले देशब्यापी ‘लकडाउन’ गरेको प्रति राजमोले समर्थन जनाएको हो ।
त्यससँगै कोरोनाको संक्रमण फैलन नदिने सीमावर्ती क्षेत्रबाट प्रवेश गरेको हजारौं नागरिकको व्यवस्थापन गर्न पनि राजमोले माग गरेको छ ।
सोमबार साँझ राजमोका उपाध्यक्ष एवं प्रवक्ता दुर्गा पौडेलले एक वक्तव्य प्रकाशित गरी भारतबाट हजारौंको संख्यामा नेपाल भित्रिएका नागरिकको स्वास्थ्य परीक्षणको उचित व्यवस्था नगर्दा कोरोना संक्रमणको भयावह अवस्था आउन सक्नेतर्फ सरकारको ध्यानाकर्षण गराउनुभएको छ । उहाँले सीमा क्षेत्रमा अलपत्र परेका नागरिकको खानपिन र बसोबासको व्यवस्था मिलाउन पनि सरकारसँग माग गर्नुभएको छ ।
वक्तव्यमो पूर्णपाठः
‘सरकारले कोरोना भाइरसमाथि नियन्त्रणका लागि जुन निर्णयहरू गरेको छ, तिनीहरूलाई हामीले स्वागत गर्दछौँ । तर ती निर्णयहरूको कार्यान्वयनको सन्दर्भमा देखापरेका केही समस्याहरूप्रति राजमोले सरकारको ध्यान आकर्षित गर्न चाहन्छ ।
भारतसँग जोडिएका नाकाहरूमा आवागमनमाथि पूरै प्रतिबन्ध लगाएपछि पनि भारतकातर्फबाट त्यसरी प्रतिबन्ध नलगाइएको हुनाले भारतीय सीमामा आएका हजारौँ नेपालीहरूलाई गम्भीर समस्या देखापरेको छ । उनीहरूलाई खानपिन र बसोवास समेतका लागि धेरै कठिनाई भएको छ । त्यो मानवीय सुरक्षालाई कसरी हल गर्ने त्यसबारे सरकारको ध्यान जानुपर्ने आवश्यकतामा हामीले जोड दिन्छौँ ।
बाँकेको रूपडिया नाकाबाट भारतीय सीमामा अलपत्र परेका ठूलो सङ्ख्याका नेपालीहरूलाई उद्धार गरेर प्रहरीले सीमावर्ती क्षेत्रका कुनै घरमा राख्ने व्यवस्था गर्यो । तर त्यहाँ सुरक्षाको कुनै व्यवस्था गरिएको थिएन । त्यसपछि त्यहाँ बसेका सबै नेपालीहरू भागेर बेपत्ता भए । उनीहरू मध्ये कसैमा कोरोना भाइरसको संक्रमण भएको भए त्यसले व्यापक रूप लिने खतरा रहने छ । त्यो समस्यालाई कसरी समाधान गर्ने ? सरकार र प्रशासन समेतको त्यसपट्टि ध्यान जानुपर्ने आवश्यकता छ ।
अन्तर्राष्ट्रिय उडानबाट नेपाल आएका मानिसहरूको काठमाडौँमा स्वास्थ्य परीक्षण वा आवश्यकतानुसार उनीहरूलाई क्वारेन्टायनमा राख्ने व्यवस्था गरिएको छ । त्यो सकारात्मक पक्ष हो । तर भारतबाट आउने हजारौँ नेपाली वा भारतीयहरूको त्यसरी स्वास्थ्य परीक्षणका लागि आवश्यक व्यवस्था र साधन समेत नभएका कारणले स्थिति गम्भीर हुने सम्भावना छ । त्यो पक्षप्रति सरकारको गम्भीर ध्यान जानुपर्ने आवश्यकतामा हामीले जोड दिन्छौँ । अन्यथा कोरोना भाइरसले देशव्यापी रूप लिने खतरा रहने छ ।
अहिले कोरोना भाइरसको खतरा रोक्नका लागि सरकार, राजनीतिक पार्टीहरू र जनता समेतको गम्भीर कर्तव्य भएको छ र सबैको एकतावद्धता र पारस्परिक सहयोगद्वारा हामीले त्यो खतरालाई रोक्ने प्रयत्न गर्नुपर्दछ । त्यसका लागि राष्ट्रिय जनमोर्चाले सहयोग गर्ने नीति अपनाउने छ ।’
