काठमाडौँ । राष्ट्रिय जनमोर्चाका अध्यक्ष तथा प्रतिनिधिसभाका सांसद केसीले व्यङ्ग्य गर्नुभएको छ : ‘संसद्को बर्खे अधिवेशन सकियो, जनतामाझ के भन्न जाने ?’
२०८० कात्तिक १६ गते बिहीबार प्रतिनिधिसभामा बोल्दै उहाँले यस्तो व्यङ्ग्य गर्नुभएको हो ।
‘जनताले सोध्ने छन्, संसद्को बर्खे अधिवेशनबाट के कति कानुन बनायौ ? के कति काम गर्यौ ?’ उहाँले भन्नुभयो– ‘हामीले यही गर्यौँ भनेर दिने उत्तर मैले अझसम्म भेट्याएको छैन ।’
अध्यक्ष केसीले बजेट वितरणप्रति असन्तुष्टि व्यक्त गर्दै व्यङ्ग्य गर्नुभयो– ‘यहाँ त भान्सेले नै बजेट चप्काउँदो रहेछ ।’
मन्तव्यको क्रममा उहाँले बागलुङ जिल्लामा बजेट नपुगेकोमा यस्तो व्यङ्ग्य गर्नुभएको थियो ।
सरकारको कामकारबाहीबारे कटाक्ष गर्दै सांसद केसीले मन्तव्य विभिन्न विषय उठाउनुभएको थियो ।
भ्रष्टाचार नियन्त्रणको प्रसङ्गमा पनि केसीले संसदीय प्रवृत्तिको आलोचना गर्नुभयो ।
‘हामीले भ्रष्टाचार उन्मूलन गर्नै सक्दैनौँ’ सांसद केसीले भन्नुभयो– ‘किनकि हामी संसद्मा आउने भनेकै कमाउनका लागि हो । सत्तामा जाने भनेकै कमाउन, सात पुस्ताको लागि सम्पत्ति जोड्न हो अनि कसरी हुन्छ भ्रष्टाचार उन्मूलन ?’
उहाँले जनतालाई केही राहत दिनका लागि सबैभन्दा पहिला सत्ताधारीहरू नै सुध्रिनुपर्ने आवश्यकतामा जोड दिनुभयो ।
लोकतन्त्र बचाऔँ
मन्तव्य राख्दै अध्यक्ष केसीले लोकतन्त्र जोगाउन त्यसका पक्षधर राजनीति शक्तिहरू एकजुट हुन आग्रह गर्नुभयो ।
‘जनताले तँ भ्रष्टाचारी होस्, घुसखोरी होस् भनेर मलाई भन्दैनन्’ उहाँले भन्नुभयो– ‘तर ती भ्रष्टाचारी, घुसखोरी, पदलोलुपको पछि तँ किन लाग्छस् भनेर जनताले मलाई प्रश्न गर्छन् ।’
आफू ठुला राजनीतिक दलको माया लागेर गठबन्धनमा नबसेको प्रसङ्ग जोड्दै उहाँले भन्नुभयो– ‘सँगै लडेर यो लोकतन्त्र, गणतन्त्र, धर्मनिरपेक्षता ल्याएको हो । अहिले पनि यो गणतन्त्र गुम्यो भने यसलाई फेरि प्राप्त गर्न डरलाग्दो सङ्घर्ष गर्नुपर्ने हुन्छ ।’
उहाँले सांसदहरूलाई २०१७ र २०५९ सालका प्रतिगमनतर्फ ध्यान दिन आग्रह गर्नुभयो ।
‘लेनिनले उति बेलै भनेका थिए, संसद् गफ गर्ने थलो हो भनेर । त्यो हामी सबैलाई थाहा छ’ उहाँले भन्नुभयो– ‘तर यो भन्दा राम्रो व्यवस्था नआउँदासम्म वा वैज्ञानिक समाजवादी व्यवस्था स्थापनाका लागि पनि यही व्यवस्थामाथि टेकेर अगाडि बढ्नुपर्ने हुन्छ ।’
उहाँ आफूले लोकतन्त्र पक्षधर शक्तिकै कमजोरीले प्राप्त उपलब्धि गुम्ने तर्क राखेको कुरा पुन: दोहोराउनुभयो ।
‘मैले पटक पटक भनेकै छु, यदि लोकतन्त्र, गणतन्त्र, धर्म निरपेक्षतालाई यदि कसैबाट खतरा छ भने त्यसको पक्षधरबाटै छ’ उहाँले भन्नुभयो– ‘त्यसकारण पहिला हामी आफै सुध्रिऊँ । सुध्रिइएन भने हामी मात्रै होइन, लोकतन्त्र र देश नै धरापमा पर्ने छ ।’
सङ्घीयताको रट नलगाऔँ
अध्यक्ष केसीले सांसदहरूलाई सङ्घीयताको रट नलगाउन आग्रह गर्नुभयो ।
‘संविधानसभाको चुनाव नहुँदै अन्तरिम संविधानमा सङ्घीयता राखियो । मैले कुरा बुझ्दिनँ ?’ उहाँले भन्नुभयो– ‘म त्यतिखेर पनि संविधानसभामै थिएँ । मलाई थाहा थियो, देशलाई अहिलेको अवस्थामा ल्याउनका लागि नै सङ्घीयता ल्याइएको थियो ।’
अध्यक्ष केसीले अगाडि भन्नुभयो– ‘तपाईंहरूले सङ्घीयताको गती देख्नुभएन कोशी प्रदेशमा ? अझै तपाईंहरू सङ्घीयता सङ्घीयता भनेर किन जनताको कान खानुहुन्छ ?’
