मुसिकोट । रक्तिम सांस्कृतिक अभियान रुकुम पश्चिमको व्यवस्थापन तथा राप्ती साहित्य परिषद् रुकुम पश्चिमको आयोजनामा २०८० कात्तिक ४ गते शनिबारका दिन दोस्रो कोशेली “सयपत्री फुुल्दा” अडियो एल्बम लोकार्पण भएको छ ।

मुसिकोट खलङ्गास्थित जनविकास पुस्तकालयको हलमा एक सय दसौँ रुकुम साहित्यमाला कार्यक्रमसँगै सो गीत लोकार्पण भएको हो । रक्तिमका केन्द्रीय अध्यक्ष गिरीप्रसाद बुढाको प्रमुख आतिथ्य रहेको कार्यक्रमको अध्यक्षता राप्ती साहित्य परिषद्का अध्यक्ष मनलाल ओलीले गर्नुभएको थियो ।

राष्ट्रिय गान तथा सहिदप्रति मौनधारणपश्चात सुरु भएको कार्यक्रममा प्रमुख अतिथिले गीत बजाएर अडियो एल्बम लोकार्पण गर्नुभएको थियो । मुसिकोट बहुमुखी क्याम्पसका पूर्व क्याम्पस प्रमुख तथा साहित्यकार मुकुन्दप्रसाद शर्माले सो गीतको विस्तृत समीक्षा गर्नुभएको थियो ।

गीत समीक्षालगत्तै कार्यक्रममा उपस्थित अन्य अतिथि तथा स्रष्टाले शुभकामना मन्तव्यका साथै आफ्ना सिर्जना पनि वाचन गर्नुभएको थियो ।

यसरी शुभकामना तथा रचना वाचन गर्नुहुने अतिथिमा मुसिकोट बहुमुखी क्याम्पसका सहप्राध्यापक हरिविष्णु ओली, कर्णाली गणतान्त्रिक साहित्य परिषद्का अध्यक्ष खेमराज खड्का, जनविकास पुस्तकालयका उपाध्यक्ष नारायणप्रसाद शर्मा, प्रगतिशील लेखक सङ्घ रुकुम पश्चिमका उपाध्यक्ष वीरबहादुर केसी, राप्ती साहित्य परिषद् जिल्ला शाखा रुकुम पश्चिमका सदस्य एक्कबहादुर केसी, साहित्यकार तथा लेखक सत्यनारायण श्रेष्ठ, स्रष्टा कल्पना बुढा, स्रष्टा सहनशीला केसीलगायत हुनुहुन्थ्यो ।

रक्तिम रुकुम पश्चिमका सचिव सीता बुढाले स्वागत मन्तव्य व्यक्त गर्नुभएको थियो सो कार्यक्रमको सञ्चालन रक्तिमकै कलाकार तथा राप्ती साहित्य परिषद् रुकुम पश्चिमका पूर्व सहसचिव समष्टी बुढाले गर्नुभएको थियो । एल्बममा गिरिप्रसाद बुढाको शब्द, मञ्जु परियारको स्वर तथा रक्तिमका महासचिव हेमराज आश्रम र गिरिप्रसाद बुढाकै सङ्गीत रहेको छ । गीत युनिक लिटरेचर प्रोडक्सन (यू.एल.पी.) युट्युब च्यानलबाट सार्वजनिक गरिएको छ ।

यस्तो छ गीत सयपत्री फुल्दा

सयपत्री फुल्दा मखमली फुल्दा

यो सप्तरङ्गी भाइटीकामा

एकहोरो टोलाउँछु रुन्छु धर्केर

परदेशी प्यारो भाइ आएन फर्केर

यसपालि पनि भाइ आएन फर्केर

आँगनीमा भैलेरी आउँदा

मिठा गीत गाउँदै रमाउँदा

यो तिहारले भाइको याद दिलायो

तुँवालो मनैमा छायो

सयपत्री …..

सामन्त र दलालको शासन

यिनले देश कङ्गाल पारे झन्

परदेशी हो फर्क देश सम्हाल्न

मिलेर कालो युग फाल्न

सयपत्री …..