काठमाडौं । राष्ट्रिय जनमोर्चाका अध्यक्ष चित्रबहादुर केसीले चैत्र महिनाभर सञ्चालन गर्न लागिएको विशेष संगठनात्मक अभियान सतर्कतापूर्वक अघि बढाउन अपिल गर्नुभएको छ ।

मंगलबार एक वक्तव्य प्रकाशित गरी अध्यक्ष केसीले विश्वब्यापीरुपमा फैलिएको कोरोना भाइरसको संक्रमणबाट बच्न ठुला भेला सम्मेलन नगर्न, बन्द ठाउँमा कार्यक्रम नराख्न सतर्कतापूर्वक अभियान अघि बढाउन आग्रह गर्नुभएको हो ।

राजमोले फागुन महिनाभर सञ्चालन गरेको संगठनात्मक अभियान उत्साहजनक भएपछि एक महिना थप गरी चैत महिनामा पनि अभियान जारी राख्ने निर्णय गरेको हो । पहिलो चरणमा सदस्यता वितरणमा जोड दिएको राजमोले पछिल्लो चरणमा संगठन विस्तारमा जोड दिने जनाएको छ ।

अध्यक्ष केसीले संकटको मौका छोपी बजारमा दैनिक उपभोग्य सामानमा कालोबजारी गरिएको भन्दै प्रभावकारी कदम चाल्न पनि सरकारसँग माग गर्नुभएको छ ।

यस्तै, उहाँले सीमा सर्वे टोलीले भारतले मिचेको नेपालको भूभाग वैधानिक रुपमै भारतमा गाभ्न खोजिएको प्रति पनि आपत्ति प्रकट गर्नुभएको छ । हालै नेपाल भारत सीमा सर्वे टोलीले कञ्चनपुरमा नेपाली भूभाग मिचेर सीमा पिलर खडा गरेपछि त्यसको व्यापक विरोध भएको छ ।

वक्तव्यमा भनिएको छः ‘फागुन महिनामा उत्साहजनक रुपमा सञ्चालित राष्ट्रिय जनमोर्चाको संगठनात्मक अभियान चैत्र महिनामा पनि जारी रहने छ । संगठनात्मक अभियानका बाँकी रहेका कामहरु चैत्र महिनामा पूरा गरिनेछन् । स्थानीय संगठनहरुको निर्माण र सदस्यता वितरणको कार्यलाई मुख्य ध्यानमा राख्दै चैत्र महिनाको संगठनात्मक अभियान सम्पन्न गरिने छ । कोरना भाइरसको महामारी विश्वव्यापी रुपमा रहेकोले व्यापक जनभेला र बन्द स्थानमा नगरी सचेत र सर्तकतापूर्वक संगठनात्मक अभियानको कार्यलाई अगाडि बढाउन हामी सबै नेता, कार्यकर्ता, समर्थक तथा शुभचिन्तकहरुलाई हार्दिक अनुरोध गर्दछौँ ।

कञ्चनपुर जिल्लाको बेल्डाँडी गाउँपालिका–३ बैवाहमा भारतले सीमा अतिक्रमण गरी निर्माण गरेको नेपाल–भारत सीमास्तम्भ स्थानीयवासीले भत्काएको घटनाप्रति हाम्रो पार्टीको ध्यान आकर्षित भएको छ । स्थानीय जनताले गरेको त्यो साहसिक कार्यप्रति हाम्रो पार्टीले सह्राना गर्दै ऐक्यवद्धता प्रकट गर्दछ ।

सन् १९८१ मा नेपाल र भारतका बीच गठित प्राविधिक समितिले नेपाल भारतको सीमाको सीमाकंन गर्ने उद्देश्यले झण्डै २६ वर्ष लगाएर सीमांकन गरी सो समिति सन् २००७ सालमा विघटन भएको थियो । सीमाकंनको दौरानमा १८३ थान स्ट्रेप नक्शा तयार गरी आ–आफनो देशको सरकारलाई बुझाएको थियो । तिनै नक्साका आधारमा कंचनपुरदेखि लिएर झापासम्म नेपाल र भारतले संयुक्त रुपमा सीमास्तम्भ निर्माणको कार्य अगाडि बढाएका छन् ।

त्यो कार्यको दौरानमा नेपालको नेपाली जनताको लामो समयदेखि भोग चलन गरी आएको लालपूर्जा प्राप्त जग्गा, स्थानीय विद्यालयको नाममा रहेका जग्गा, नहर र स्वयम् भारतको लगानीमा निर्माणाधीन हुलाकी सडकको बेल्डाँडी– बेलौरी खण्ड भारततर्फ पर्न गएको छ । त्यसैगरी बेलौरी, पुनर्वास तथा भीमदत्त नगरपालिकामा पनि त्यही प्रकारको समस्या देखा परेको छ । ती समस्याहरुलाई हेर्दा यो भन्नका लागि प्रर्याप्त आधार छ कि दुबै देशले दावी गरे अनुसार नेपाल र भारत बीचको ९७ प्रतिशत सीमा समस्या समाधान भएको दावीको खोक्रोपना उजागर भएको छ ।

विधिवत रुपमा नेपालको भूमि भारततर्फ गाभ्ने काम भएको छ । सीमांकनको दौरानमा नेपाल पक्षका प्राविधिहरुले नेपालतर्फका स्थानीय जनता, लालपूर्जा प्राप्त किसान, स्थानीय जनप्रतिनिधि तथा नेपाल सरकारका कार्यालयमा भएका आधिकारिक अभिलेखहरुलाई नहेरी नबुझी भारतको प्रभाव र दबावमा नक्शा तयार पारेको परिणाम नै अहिले देखा परेको समस्या हो । तसर्थ गलत ढंगबाट तयार गरिएको सीमांकनको पुनरावलोकन हुनुपर्दछ र सीमास्तम्भ निर्माणको कार्य तत्काल रोकिनुपर्दछ ।

अहिले विश्वव्यापी रुपमा कोरना भाइरसको महामारी फैलिएको छ । नेपालमा अहिलेसम्म कोरना भाइरसबाट बच्ने सन्तोजनक र भरपर्दो तयारी गरिएको देखिंदैन । समयमा नै त्यससम्बन्धी तयारी गर्न नसकेमा त्यसबाट धेरै ठूलो क्षति हुन सक्ने सम्भावना छ । नेपाल कोरना भाइरसको उच्च जोखिममा रहेकोले त्यो महामारीबाट हुनसक्ने क्षतिबाट बच्नका लागि नेपाल सरकारले पूरा ध्यान दिनुपर्दछ । स्वास्थ्य सुरक्षालाई प्राथमिकतामा राखेर सरकारले आफ्नो ध्यान केन्द्रित गर्नुपर्ने आवश्यकता छ ।

अन्तराष्ट्रिय विमानस्थलमा भरपर्दो स्वास्थ्य जाँच व्यवस्था गर्नका साथै नेपालका अस्पतालहरुलाई सतर्क र तयारी अवस्थामा रहनका लागि सरकारले पूरा ध्यान दिनु आवश्यक छ । सामूहिक जीवनशैलीमा रहेका जनसमुदाय, यातायात, विद्यालय, कलेज र अन्य सार्वजनिक स्थलहरुमा जनताको स्वास्थ्य स्थितिबारे गम्भीर हुन हामी सरकारको ध्यान आर्कषित गर्दछौँ ।

यस सन्दर्भमा कोरना भाइरसको सन्त्राससँगै कालोबजारी पनि व्यापक रुपले बढेर जान थालेको छ । मास्क र बिभिन्न सरसफाइसम्बन्धीका सामग्री, ग्यास र बिभिन्न खाद्य पदार्थहरुको कृतिम अभाव खडा गरी कालोवजारी बढेको छ । त्यसप्रकारको कालोबजारीलाई पूरै निरुत्साहित गरी आवश्यक कारवाही चलाउँदै सर्वसाधारण जनतालाई सुलभ र सहज रुपमा ती उपभोग्य सामग्रीहरु प्राप्त हुने व्यवस्था गर्न सरकारलाई हामी ध्यान आकर्षित गर्दछौँ । यसै सन्दर्भमा विश्वव्यापी महामारीको रुपमा रहेको कोरना भाइरसको समस्याविरुद्ध लड्न सार्क राष्ट्रहरुले प्रकट गरेको ऐक्यवद्धतालाई पनि हाम्रो पार्टीले स्वागत गर्दछ ।’