काठमाडौं । राष्ट्रिय जनमोर्चाले फागुन महिनाभर सञ्चालन गरेको विशेष संगठनात्मक अभियान चैत महिनामा पनि जारी हुने भएको छ । एक महिने अभियानको सफलताबाट उत्साहित राजमोले अभियानलाई थप एक महिना निरन्तरता दिने निर्णय गरेको हो ।
राष्ट्रिय जनमोर्चाका उपाध्यक्ष एवं प्रवक्ता दुर्गा पौडेलले अभियानलाई चैत महिनाभरी निरन्तरता दिने निर्णय गरिएको युगदर्शनलाई जानकारी दिनुभयो । ‘फागुन महिनाको संगठनात्मक अभियान उत्साहका साथ सफल भएको छ ।’ पौडेलले भन्नुभयो, ‘कैयौं ठाउँमा साथीहरुले हामीलाई समय पुगेन भन्नुभयो, फिल्डमा खटिएका साथीहरुको सल्लाह बमोजिम अभियानलाई निरन्तरता दिने निर्णय गरेका हौं ।’
उपाध्यक्ष पौडेलले फागुन महिनामा सदस्यता वितरण अभियानलाई प्राथमिकता दिइएकोमा अब संगठन निर्माणलाई प्राथमिकता दिने बताउनुभयो । ‘फागुन महिनाभर सदस्यता वितरण गरिएको छ । अब सदस्यता लिएकालाई संगठित गर्दै जान्छौं’ उहाँले भन्नुभयो, ‘फागुनमा पुग्न नसकेका कतिपय गाउँ टोलमा पुगेर सदस्यता दिने र प्रशिक्षण सञ्चालन गर्ने काम पनि निरन्तर हुनेछ ।’
राष्ट्रिय जनमोर्चाले चैत महिनाभर संगठनात्मक अभियान सञ्चालन गर्ने निर्णय गरेसँगै अखिल नेपाल किसान महासंघले सञ्चालन गर्न लागेको अभियान भने भदौका लागि सारिएको छ । राजमो उपाध्यक्ष पौडेलले दुईवटा अभियान सँगसँगै गर्दा प्रभावकारी नहुने भएकोले किसानको अभियानलाई भदौमा सारेको जानकारी दिनुभयो ।
किसान महासंघले यही चैत महिनामा देशव्यापी रुपमा संगठन निर्माण अभियानको सुरुवात गर्ने तयारी थालेको थियो । तर, अब सो अभियान भदौमा सरेपछि किसान महासंघसहित सबै जनवर्गीय संगठनका नेता कार्यकर्ताहरु राजमोको संगठन निर्माण अभियानमा सहभागी हुनेछन् ।
