नेपालगञ्ज । राष्ट्रिय जनमोर्चा बाँकेले फुटपरस्त गतिविधिमा संलग्न भएको आरोपमा गौरीलाल कार्कीलाई पार्टीबाट निष्काशन गरेको छ ।
राष्ट्रिय जनमोर्चाका जिल्ला अध्यक्ष भिमप्रसाद देवकोटाद्वारा आइतबार जारी प्रेस विज्ञप्तीमा कथित राष्ट्रिय जागरण अभियानको केन्द्रमा बसेर गतिविधि गरेको भन्दै पार्टीको साधारण सदस्यसमेत नरहने गरी अनिश्चितकालका लागि निष्काशन गरिएको जनाइएको छ ।
विज्ञप्तिमा भनिएको छ, ‘पार्टीको हित विपरीत र अनाधिकृत रुपमा केही व्यक्तिहरुको फुटपरस्त उद्देश्यद्वारा गठित कथित ‘राष्ट्रिय जागरण अभियान’को केन्द्रमा रही गौरिलाल कार्कीले आफ्नो गतिविधि गरेको प्रति राष्ट्रिय जनमोर्चा बाँकेको ध्यान आकृष्ट भएको छ । वहाँको उक्त कार्य पार्टी तथा संगठनको अनुशासनको गम्भीर उल्लंघन ठहर गरी गौरिलाल कार्कीलाई राष्ट्रिय जनमोर्चाको साधारण सदस्यबाट अनिश्चितकालको लागि निश्कासन गरिएको जानकारी गराइन्छ । साथै राष्ट्रिय जनमोर्चाका सम्पूर्ण सदस्य तथा शुभचिन्तकहरु वहाँको त्यसप्रकारको अनुशासनविहीन र पार्टी तथा संगठनको हित विपरीत गतिविधिको भ्रममा नपर्न र वहाँसँग सम्पर्क नगर्न अनुरोध गरिन्छ ।’
राष्ट्रिय जनमोर्चाले कथित ‘राष्ट्रिय जागरण अभियान’ पार्टीमा फुट पार्ने उद्देश्यसहित गठन भएको उल्लेख गर्दै आफ्ना नेता कार्यकर्ताहरुलाई त्यसमा सामेल नहुन निर्देशन जारी गरेको छ । सो समूहमा संलग्न केही व्यक्तिलाई राजमोले यस अघि पनि कारबाही गरेको थियो ।
