काठमाडौं । राष्ट्रिय जनमोर्चाका सांसद दुर्गा पौडेलले भारतले अतिक्रमण गरी आफ्नो नक्सामा सार्वजनिक गरेको कालापानी, लिपुलेक र लिम्पियाधुरासहितको नयाँ नक्सा सार्वजनिक गर्न माग गर्नुभएको छ । बिहीबार संसदको विशेष समयमा बोल्दै सांसद पौडेलले भारतले गरेको अतिक्रमणलाई अन्तर्राष्ट्रियकरण गर्नसमेत माग गर्नुभयो ।
विश्वव्यापी रुपमा फैलिएको कोरोना भाइरस र राजनीतिक खिचातानीबीच देशको सीमा अतिक्रमणमा परेको विषय ओझेलमा परेका बेला राष्ट्रिय जनमोर्चाका उपाध्यक्षसमेत रहनुभएको सांसदले अतिक्रमणबारे फेरि राष्ट्रको ध्यानाकर्षण गराउनुभएको हो ।
विशेष समयमा बोल्दै पौडेल भन्नुभयो, ‘भारतले नेपालको लिम्पियाधुरा, लिपुलेक लगायतका धरै जमीनसहित नक्सा प्रकाशित गर्यो । जुन अत्यन्त गम्भीर कुरा हो । त्यो विषयलाई लिएर नेपाली जनताले धेरै आवाज उठाए, आन्दोलन पनि गर्दै आए । भारतले लिपुलेकको जमीन मात्र हडप्नलाई नभएर नेपाललाई सिक्किम जस्तै बनाउने योजनाका साथ काम गरिएको छ ।’
भारतको यो कदमलाई रोक्न नेपालले नयाँ नक्सा प्रकाशित गर्नुपर्ने र विषयलाई अन्तर्राष्ट्रियकरण गर्नुपर्ने आवश्यकतामा सांसद पौडेलले जोड दिनुभयो ।
‘लिम्पियाधुरा लगायतका क्षेत्रमा हस्तक्षेप गरेर भारतको नक्सामा सामेल अतिक्रमित भूमीलाई नेपालको नक्सामा प्रकाशित गर्नुपर्ने जरुरी छ ।’ उहाँले भन्नुभयो, ‘त्यति मात्रै नभएर हामीले यो बिषयलाई लिएर अन्तर्राष्ट्रियकरण गरेर यसलाई सयुक्त राष्ट्रसंघ, अन्तर्राष्ट्रिय अदालतमा यो विषयलाई लिएर जान जरुरी छ ।’
पौडेलले कालापानीबाट भारतीय सेना हटाउन सरकारले दिएको अभिव्यक्तिको स्वागत गर्दै त्यतिले मात्रै नपुग्ने बताउनुभयो । भारतले सहजै नेपालको जमिन नछोड्ने भएकाले त्यस विरुद्ध कठोर कदम चाल्न आवश्यक रहेको उहाँको भनाई थियो । ‘भारतले योजनावद्ध तरिकाले नेपाललाई सिक्किमीकरण बनाउन काम गरिरहेको छ’ उहाँले भन्नुभयो ‘त्यसकारण यो विषय सहज छैन । सरकारले गम्भीरतापूर्वक ध्यान देओस् ।’
