सन्धिखर्क । देशभक्तिपूर्ण भावले ओतप्रोत गीत “टिस्टा काँगडा” को भिडियो सार्वजनिक भएको छ ।
हाल राष्ट्रिय जनमोर्चा अर्घाखाँचीका अध्यक्षसमेत रहनुभएका स्रस्टा थम्मन केसीको शब्दमा सो भिडियो सार्वजनिक भएको हो ।
चर्चित आधुनिक गायक सौगात सायरले लय र सङ्गीत भरेर स्वर दिएको सो गीतको लागि अर्घाखाँचीका पत्रकार वसन्त खडकाले भिडियो निर्माण गरेर २०८० भदौ १ गते सार्वजनिक गर्नुभएको हो ।
यसअघि यो गीतमा थुप्रै सङ्गीत पारखीहरूले टिकटक बनाइसकेका छन् ।
ग्रेटर नेपालको अवधारणा बोकेर बनाइएको यस गीतमा आम देशभक्त नेपालीलाई ‘टिस्टा काँगडा पुग्न सक्ने हैन र ?’ भन्ने प्रश्न गर्दै देशको सीमा मिचिन नदिन हौसला प्रदान गरिएको निर्माता वसन्त खड्काले बताउनुभयो
वर्तमान नेपालको पूर्वमा मेचीदेखि अझै पूर्व दार्जिलिङ, सिक्किमभन्दा अझै पूर्व टिस्टासम्म र पश्चिमा कुमाउँ, गढवाल, सतलजसम्म नेपालको भूभाग भएको इतिहासको सम्झना गरिएको छ ।
विभिन्न कालाखण्डमा भएका राष्ट्रघाती सन्धिसम्झौताका बाबजुद बचेको थोरै भूमिमा पनि छिमेकी भारतीय साम्राज्यवादले अझै अतिक्रमण नत्यागेको सन्देश यो गीतले दिएको उहाँको भनाइ छ ।
गीतमा छिमेकी देशले मनोमानी गर्दै हाम्रो देशको भूमि वर्षौंदेखि अतिक्रमण गर्दै आइरहेको र सीमाविवादमा हजारौँ नेपाली जनतालाई बुट प्रहार गरेको, कालापानी, लिपुलेक, लिम्पियाधुरा, सुस्ता, महेशपुर, मानेभञ्ज्याङलगायतका सिमाना अतिक्रमणका विरुद्ध आवाज उठाउने प्रयास गरिएको छ ।
गीतको अडियो रेकर्डिङ दुई वर्षअगाडि गरिएता पनि भिडियो छायाङ्कन २०८० असार २४ का दिन अविरल फिल्म प्रालिको प्राविधिक सहयोगमा सम्पन्न भएको थियो ।
विष्णु भट्टराईको निर्देशनमा बनाइएको यो म्युजिक भिडियोको सुटिङ ऐतिहासिक जितगढी किल्ला र बुटवलका विभिन्न स्थानमा गरिएको थियो ।
