काठमाडौं । वैशाख १० गते हुने उपनिर्वाचनका लागि राष्ट्रिय जनमोर्चाले चितवन क्षेत्र नं २ मा उपाध्यक्ष जनकराज शर्मालाई अघि सारेको छ । शर्माले सोमबार मुख्य निर्वाचन कार्यालय पुगेर उम्मेदवारी दर्ता गराउनुभएको छ ।
‘साम्राज्यवादको भण्डाफोर’ गर्ने एजेण्डासहित राष्ट्रिय जनमोर्चाले चितवनमा उम्मेदवारी दिएको हो । उम्मेदवारी दर्ता गर्न राजमोका नेता कार्यकर्ता जुलुशसहित मुख्य निर्वाचन अधिकृतको कार्यालय पुगेका थिए ।
सो क्षेत्रमा राष्ट्रिय स्वतन्त्र पार्टीले सभापति रवि लामिछाने, नेपाली कांग्रेसबाट जितनारायण श्रेष्ठ, नेकपा (एमाले) का रामप्रकाश न्यौपाने र राप्रपाले जीवलाल पुरीलाई अघि सारेको छ ।
गत मङ्सिर ४ गते भएको प्रतिनिधिसभाको निर्वाचनमा चितवन २ बाट निर्वाचित रास्वपाका केन्द्रीय सभापति लामिछाने नागरिकता मुद्दामा दोषी ठहर भएसँगै सांसद पद खारेज भएपछि यहाँ उपनिर्वाचन हुन लागेको हो।
उपनिर्वाचमा चितवन क्षेत्र नम्बर २ मा १ लाख २४ हजार छ सय ९५ जनाले मतदान गर्न पाउनेछन्। उनीहरूले ४३ स्थलका १३८ केन्द्रबाट मतदान गर्ने छन्।