काठमाडौं । राष्ट्रिय जनमोर्चाका अध्यक्ष चित्रबहादुर केसीले रक्तिम सांस्कृतिक अभियानका पूर्व कोषाध्यक्ष विष्णु शर्मालाई ‘भरोसायोग्य’ कार्यकर्ताको रुपमा स्मरण गर्नुभएको छ ।
शर्माको प्रथम स्मृति दिवसका अवसरमा रक्तिम सांस्कृतिक अभियानले बुधबार काठमाडौंमा आयोजना गरेको कार्यक्रममा बोल्दै अध्यक्ष केसीले विष्णु अप्ठ्यारो अवस्थामा काम गर्ने व्यक्ति हुनुहुन्थ्यो भन्नुभयो । सहज परिस्थितीमा पार्टीको काम गर्न सबै जना तयार भएपनि विष्णु असहज अवस्थामा समेत काम गर्न अघि सर्ने कार्यकर्ता भएको केसीको भनाई थियो ।
‘पार्टीले कुनै योजना बनायो र अप्ठ्यारो अवस्था आयो भने विष्णु शर्माले ‘म छु नि’ भन्नुहुन्थ्यो । पार्टीलाई अप्ठ्यारो पर्दा जिम्मेवारी लिन अघि सर्नुहुन्थ्यो’ केसीले भन्नुभयो, ‘उहाँ एउटा इमान्दार र क्रान्तिकारी युवा हुनुहुन्थ्यो । बाँचुन्जेल देश र जनताका लागि योगदान गर्नुभयो ।’
अध्यक्ष केसीले विष्णु शर्माबाट सिकेर जस्तोसुकै परिस्थितीमा पनि पार्टी, क्रान्ति, देश र जनताका लागि काम गर्न तयार हुनुपर्ने बताउन्ुभयो । उहाँले पार्टीले अघि सारेको क्रान्तिकारी विचारलाई अघि बढाउन रक्तिमले महत्वपूर्ण भूमिका खेलेको पनि स्पष्ट पार्नुभयो ।
सो अवसरमा रक्तिम सांस्कृतिक अभियानले तयार पारेको विष्णु शर्मासम्बन्धी वृत्तचित्र पनि अध्यक्ष केसीले विमोचन गर्नुभयो ।
कार्यक्रममा राजमो महासचिव मनोज भट्ट, राष्ट्रिय सभा सदस्य एवम् रक्तिमका संस्थापक राजेश विक, लुम्बिनी प्रदेश सभा सदस्य तारा थापा क्षेत्र, अखिल नेपाल कानुन व्यवसायी संघका अध्यक्ष अधिवक्ता पदम रोका, बुद्धिजीवी समीर सिंहलगायत नेताहरुको आतिथ्यता रहेको थियो ।
रक्तिमका केन्द्रीय सदस्य मेस्मा पुनको अध्यक्षता र उपाध्यक्ष हेमराज पुनले सञ्चालन गर्नुभएको कार्यक्रममा विष्णु शर्माका सहकर्मी रक्तिमका कलाकारहरुले उहाँको फोटोमा माल्यार्पण गरेर श्रद्धाञ्जली अर्पण गरेका थिए ।
रक्तिमका तत्कालिन कोषाध्यक्ष विष्णु शर्माको गत वर्ष २०७८ फागुन २४ गते ३० वर्षको उमेरमा जण्डिसका निधन भएको थियो । उहाँले रक्तिमका थुप्रै गीतमा नृत्य तथा अभिनय गर्नुभएको छ भने नयाँ कलाकार उत्पादन गर्न नृत्य प्रशिक्षकको समेत जिम्मेवारी निर्वाह गरिरहनुभएको थियो ।
