टेकराज भुसाल (टेकु) बुटवल ।
प्रदेश ५ का सांसद तारा जिसीले देशमा साम्राज्यवादी खतरा बढ्दै गएको बताउनुभएको छ । बिहीबार प्युठानको गौमुखी नगरपालिका–५ ठूलावेसीस्थित गौमुखी माध्यमिक विद्यालय को २९औं वार्षिक उत्सव तथा अभिभावक दिवसलाई सम्बोधन गर्दै सांसद जिसीले साम्राज्यवादी चलखेलप्रति जनता सचेत हुनुपर्ने बताउनुभयो ।
देशमा साम्राज्यवादीहरूको चलखेलले राष्ट्रियता,अखण्डता र सार्वभौमिकतामाथि हमला भइरहेको उहाँको भनाई थियो । ‘देशमा अमेरिकी तथा भारतीय साम्राज्यवादको हस्तक्षेप बढ्दै गईरहेको छ’ सांसद जिसीले भन्नुभयो, ‘साम्राज्यवादीहरुका अगाडि सरकारमा बस्नेले घुँडा टेकिरहेका छन् । यस्तो अवस्थामा जनता थप सचेत र संगठित हुनुपर्ने आवश्यकता छ ।’
सांसद जिसीले शिक्षाको समाज विकासमा निर्णायात्मक भूमिका हुने र शिक्षामा सबैको पहुँचले नै वास्तविक स्वतन्त्रता र अधिकार उपयोगको लागि सामर्थ्य बनाउनुपर्नेमा जोड दिनुभयो । समाजमा फैलिएका कुसंस्कार, कुरिती, अन्धविश्वास जस्ता असमाजिक मुल्य र मान्यता अन्त गर्न शिक्षाको निर्णायात्मक भूमिका हुने उहाँको भनाई छ । कानुनमा शिक्षाको बारेमा धेरै कुराहरू उल्लेख गरेपनि ब्यवहारमा लागु गर्न नसकिएको सांसद जिसीले बताउनुभयो । समाजका लागि प्राविधिक, सिपमुलक तथा ब्यवहारिक शिक्षाको आवश्यकता रहेको जिसीले बताउनुभयो ।
कार्यक्रममा गौमुखी गापा अध्यक्ष बिष्णु कुमार गिरी, समाजसेवी ज्ञामुराम न्यौपाने, पूर्व प्रधानअध्यापक भेषमान गिरी लगायतको उपस्थित रहेको थियो। विद्यालय व्यवस्थापन समितिका अध्यक्ष टुक बहादुर केसीको अध्यक्षता, शिक्षक लोकन्द्र जिसीको सञ्चालन र स्वागत राम बहादुर भण्डारीले गर्नु भएको थियो भने विद्यालयको वार्षिक आय व्यय प्राचार्य अर्जुन बहादुर केसीले प्रस्तुत गर्नुभएको थियो ।
