काठमाडौँ । अखिल नेपाल किसान महासङ्घ (अप्फा) ले राष्ट्रिय जनमोर्चाका अध्यक्ष तथा कम्युनिस्ट नेता चित्रबहादुर केसीको विजयप्रति बधाई ज्ञापन गरेको छ ।
अध्यक्ष भैरवराज रेग्मीको हस्ताक्षरमा २०७९ मङ्सिर ९ गते प्रेसवक्तव्य जारी गर्दै अप्फाले बधाई ज्ञापन गरेको हो ।
वक्तव्यमा अध्यक्ष केसीका साथै बागलुङमा प्रतिगमन विरोधी गठबन्धनका उम्मेदवार विजयी भएकोमा पनि बधाई व्यक्त गरिएको छ । त्यसका साथै देशैभरिबाट गठबन्धनका उम्मेदवारहरू विजयी भएकोमा हर्ष र बधाई प्रकट गरिएको छ ।
यस्तो छ, प्रेसवक्तव्यको पूर्ण पाठ :
“राष्ट्रिय जनमोर्चाका अध्यक्ष तथा कम्युनिस्ट नेता चित्रबहादुर केसी बागलुङ जिल्लाबाट प्रतिनिधि सभामा निर्वाचित हुनुभएकोमा अखिल नेपाल किसान किसान महासङ्घ (अप्फा) हार्दिक बधाई व्यक्त गर्दछ । बागलुङ जिल्लामा प्रतिगमन परास्त भएको र गठबन्धनका उम्मेदवारहरू विजयी भएकोमा खुसी प्रकट गर्दछ । अहिलेसम्मको नतिजाले गठबन्धन उम्मेदवार विजयतर्फ अगाडि बढिरहेको र अन्तमा देशबाट तत्कालका लागि प्रतिगमन पराजित हुने कुरामा हामी विश्वस्त छौँ ।
आजको चुनाव प्रतिगमनलाई परास्त गर्ने चुनाव हो । यो चुनावमा इमानदार पक्षहरूले आफ्नो स्थितिलाई पनि त्याग गरेका छन् । मतदान र उम्मेदवारीमा पनि त्यस प्रकारको इमानदार भूमिका निर्वाह गरेका छन् । कतिपय पक्षले प्रतिगमनको मर्मलाई आत्मसात नगरेको देखिएको छ तैपनि समग्रमा प्रतिगमनको तत्कालका लागि हार भएको छ । यस प्रकारको प्रतिगमनको लडाइँ अझै लामो समयसम्म लड्दै जानुपर्दछ । यस प्रकारको लडाइँ जित्न सबै देशभक्त, न्यायप्रेमी जनता एकताबद्ध भएर अगाडि बढ्न आवश्यक छ ।
अन्तमा, प्रतिगमन विरोधी विजयी सम्पूर्ण उम्मेदवारलाई हार्दिक बधाई दिन चाहन्छौँ ।”
