काठमाडौं । नेपाल कम्युनिष्ट पार्टी (मसाल) का महामन्त्री मोहनविक्रम सिंहले वर्तमान संसदीय व्यवस्था र राजनीतिक दलप्रतिको वितृष्णाले स्वतन्त्र दल वा व्यक्तिहरुको उदय भएको बताउनुभएको छ ।
मंगलबार स्पेस ४के टेलिभिजनलाई दिनुभएको अन्तर्वार्तामा महामन्त्री सिंहले युवकहरुको भूमिका उल्लेखनीय हुने भएपनि यसले कुन दिशा लिन्छ भन्न नसकिने बताउनुभयो ।
खासगरी स्वतन्त्रको रुपमा राजनीतिमा उदाएका युवकहरु राजनीतिक आन्दोलन वा कुनै नीति सिद्धान्तको आधारमा नभइ राजनीतिक दलप्रतिको असन्तुष्टिका कारण उदय भएकोले गलत बाटोतिर जासक्ने उहाँको भनाई छ ।
जर्मनीमा दल तथा नेताहरुको असन्तुष्टिबाटै हिटलरको उदय भएको बताउँदै सिंहले नेपालमा पनि असन्तुष्टि बढ्दै जाँदा अधिनायकवा जन्मन सक्ने खतरा औँल्याउनुभयो ।
महामन्त्री सिंहले अहिलेको चुनाव प्रतिगमन र अग्रगमनबीचको लडाइँ भएको पनि स्पष्ट पार्नुभएको छ । प्रतिगमनले जिते जनताले दशकौँदेखि लडेर ल्याएका उपलब्धि गुम्ने सिंहको चेतावनी छ ।
