बबिन आचार्य/मिलन सुनार, पोखरा ।
अखिल नेपाल युवक सङ्घका अध्यक्ष कृष्णराज पाण्डेले युवक संघ क्रान्तिकारी विचार बोकेको सङ्गठन भएको दाबी गर्नुभएको छ ।
नेकपा (मसाल) को सहायक सङ्गठन युवक सङ्घ कास्कीको २०७९ भदौ २५ गते सम्पन्न जिल्ला भेलाको उद्घाटन गर्दै पाण्डेले उक्त कुरा बताउनुभएको हो ।
उहाँले वर्तमान सत्ता सञ्चालकहरूले राज्यमाथिको बह्मलुट जारी राखे विचारहरू विष्फोटन हुने, त्यस क्रममा युवाहरूले सडक सङ्घर्षका लागि क्रान्तिकारी विचार, सिद्वान्त र अनुशासित तथा मिलिट्यान्ट सङ्गठन निर्माणमा जोड दिनुभयो ।
अध्यक्ष पाण्डेले नेपाली जनताले लामो समयसम्म आन्दोलन र बलिदानबाट प्राप्त उपलब्धिलाई रक्षा गर्दै थप अधिकारलाई संस्थागत गर्नुपर्ने बताउनुभयो ।
शिक्षा, स्वास्थ्य जस्ता आधारभूत सुविधाको साथमा युवालाई स्वदेशमा नै रोजगारको ग्यारेन्टीको गर्न मुख्य दुस्मनका विरुद्व सहायक दुस्मनसँग कार्यगत एकताको रूपमा पाँचदलीय चुनावी तालमेलको नीति आवश्यक रहेको बताउनुभयो ।
कार्यक्रममा अखिल नेपाल किसान महासङ्घ (अप्फा) का अध्यक्ष एवम् राष्ट्रिय भूमि आयोगका सदस्य भैरवराज रेग्मीले पुँजीवादीहरूले आफ्नो स्वार्थका लागि युवाहरूलाई विभिन्न सपनामा रनभुल्ल पार्ने गरेको बताउनुभयो ।
नेपालका युवाहरूको श्रमले विदेशी मुलुक बनेको तर नेपालका नेताहरूले युवाको सृजनशीलतालाई स्वदेशमा लगाउन नसक्नु दुखद भएको उल्लेख गर्नुभयो ।
राष्ट्रिय जनमोर्चा गण्डकी प्रदेशका अध्यक्ष शङ्कर बरालले समेत शुभकामना मन्तव्य राख्नुभएको उक्त कार्यक्रममा अखिल (छैठांै) का केन्द्रीय उपाध्यक्ष गणेश अधिकारी, सचिव इन्द्रमणि पाण्डे, राजमो कास्कीका अध्यक्ष रविमोहन ढकाल, उपाध्यक्ष तमबहादुर रोकालगायतको आतिथ्य रहेको थियो ।
कार्यक्रम दानु सारूको अध्यक्षता, डम्बर कार्कीको सञ्चालन र सोमनाथ अधिकारीको स्वागत मन्तव्यका साथ सम्पन्न भएको थियो ।
