नविन पाण्डे, झापा ।
नागरिकता विधेयक र संघीयता खारेजीको माग गर्दै अखिल (छैठौं) ले झापाको दमकमा पनि मसाल जुलुश प्रदर्शन गरेको छ ।
अखिल (छैठौं) १ नम्बर प्रदेश समितिले संसदको दुवै सदनबाट पारित नागरिकता विधेयक र प्रदेश खारेजीको माग गर्दै शुक्रबार साँझ मसाल जुलुश प्रदर्शन गरेको हो ।
गोर्खा डिपार्टमेन्ट चोकबाट नारासहित सुरु भएको मसाल जुलुश गणतन्त्र चौक पुगेर कोणसभामा परिणत भएको थियो ।
त्यसक्रममा विद्यार्थीहरुले ‘नागरिकता विधेयक खारेज गर, संघीयता खारेज गर, एमसीसी चाहिँदैन, महंगी भ्रष्टाचार नियन्त्रण गर’ लगायतका चर्का नारा लगाएका थिए ।
कोणसभालाई सम्बोधन गर्दै अखिल (छैठौं) १ नम्बर प्रदेश समितिका अध्यक्ष देवेन्द्र पौडेलले वर्तमान सरकारले एकपछि अर्को गर्दै राष्ट्रघाती काम गरेको आरोप लगाउनुभयो ।
उहाँले संसदबाट पारित नागरिकता विधेयक फिर्ता लिन र विदेशीलाई दिएको नागरिकता छानबिन गर्न माग गर्नुभयो ।
कोणसभाको सञ्चालन अखिल (छैठौं) १ नम्बर प्रदेश सचिव अमीर बास्केटाले गर्नुभएको थियो ।
अखिल (छैठौं) ले नागरिकता विधेयक, एमसीसी, एसपीपी, महंगी, भ्रष्टाचारलगायतका विषयमा आज देशब्यापी मसाल जुलुश प्रदर्शन गरेको हो ।
